Rewşa hepsîyê nêweşan roj bi roje tewr giran bena 

2018-10-30 12:25:58


	 

	MÊRDÎN - Keyeyê hepsîyê nêweşan ke hepisxaneyê Şakranî yê cinîyan de manenê dîyar kerdî ke roj bi roje rewşa weşîya nêweşan seba şert û mercê giran yê hepisxaneyan tewr xirab bena û vengdayîşê hîsgêrî kerdî.

	 

	Hepisxaneyê Cinîyan ê Şakranî de hepsîyê nêweş her ke şino rewşa înan tewr giran bena. Maya bi nameyê Mevlûde Baştaş(60) ke 3 serrî verê seba ke bi xeylê kesî dir şîya Koyê Bagokî û uca de bi çalakîya qalxanê ganî dayî destpêkerdiş, bi desan kesî dir amî tepiştiş. Mevlude Beştaşa ke dimayê serrêke bi sebebê “Propagandayê Rêxistine kerda" 4 serrî û 3 aşmî ceza aye rê ame birnayîş û nika Hepisxaneyê Cinîyan ê Şakranî de yena tepiştiş û weşîya aye roj bi roje ver bi xirabî şina. Kênaya Mevlûde, Mekîye Yapiştiran derheqê rewşa maya xo de qisey kerde û va rewşa weşîya maya aye nêbaş a û waşte ke ganî maya aye serbest bêra veradayîş.

	 

	Mekîye, dîyar kerde ke maya aye bi sebebê “Propagandayê Rêxistine” 4 serrî û 3 aşmî ceza girewta û wina va: "Maya mi 3 serrî verê seba azadî xeylê kesî dir seba biba qalxanê ganî şî koyê  Bagokî û uca de xeylê embazanê xo dir amî tepiştiş û dima ra serbest veradayî. La cigêrayîşî maya mi dewam kerdêne û dima ra ceyaza aye amî qebulkerdiş û wexto ke Antalya de şî nêweşxane amî tepiştiş. Emrê maya mi 60 serrî yo û nêweş a. Ganî dosyaya maya bişîne hukmî rê û mîyanê 5 serran de ser de cigêrayîş bi ameyne kerdene. La cezaya maya mi mabêne serrêke de amî tesdîqkerdiş."

	 

	'Maya mi hem nêweşa û hem zî rastê tedayan yena' 

	 

	Mekîye, arde ziwan ke verê çend rojan şîya pêvînayîşê maya xo û va ke rewşa maya aye hepisxane de baş nîya. Mekîye da zanayîş ke maya aye nêweşa şekirî ya, la hepisxane de birinc û makarna danê û wina va: "Maya min a ke nêweşîya şekir û qelbî ya û gurçikê aye zî ameyo neqlkerdiş û çimêke maya mi zî hepisxane de kor bîyo. Çimê maya mi seba tansiyonê aye estbi ke nêame dermankerdiş kor bi. Maya mi bi na rewşe nêeşkena verê şert û mercê hepisxaneyî debara xo bikera. Hende nêweşîyê maya mi estê la reyna zî aye vera nêdanê. Tewr peyîn maya mi uca de berdê nêweşxane û doktor vato ke rewşa aye baş nîyo. Seba ke maya mi tirkî nizana, nêweşxane de doktorî teda kenê vanê ke ti çira tirkî qisey nêkena. Xora se ra 80 raporê aye ke nêeşkena hepisxane de bimana esto, la reyna aye hepisxane de verdenê."

	 

	'Eke hepisxane de bimana do rewşa aye tewr xirab biba'

	 

	Mekîye, tewr peyîn qiseykerdişê xo de waşte ke maya aye demêke nêzdî de bêra veradayîş û wina va: "Eke hepisxane de bimana do rewşa aye tewr xirab biba. Ma muracatê ÎHD û AÎHMî kerd, la heta nika ti cewab nêdayî ma. Ewro dewlete bi taybetî serê cinîyan de hêriş û tedayan kena. Seba ke ewro cinî têkoşînêke pîl danê û bi nêweşî û emrê xo yê pîl hepisxaneyan de yenê tepiştiş."

	 

	'Wa Meles Tekîne bêra veradayîş'

	 

	Heto bîn ra cinîya bi nameyê Meles Tekîn(70) a ke mîyanê komelî de bi nameyê Melo zî yena naskerdiş, aye 3 serrî verê seba ke beşdarê çalakîya qalxanê ganî bîya bi îdayê 'propagandaya rêxistine kerda'  4 sal û 2 aşmî ceza aye rê ameya birnayîş û Hepisxaneyê Xerpêtî de yena tepiştiş. Melesa ke seba emrê aye pîl o zaf nêweşîyê aye estê û hepisxane de rewşa aye nêbaş a. Keyeyê Melese dîyar kerd ke her ke şino rewşa aye tewr xirab beno û waştî ke demêke nêzdî de serbest bêra veradayîş.