31ê Adare do seba Wanî bibo roja hesabperkerdişî 

2018-10-29 14:00:09


	 

	WAN - Hemsereka HDPyî ya Wanî Yadîşen Karabulake dîyar kerde ke do weçînayîşê 31ê Adare de 14 şaredarîyan zî bigîrî û wina dewam kerde: “Şîyayîşê qayûman moralêk gird dano şar. Ma bi omidê herînayîşê pêroyê şaredarîyan nizdîyê weçînayîşî benî. Şar 31ê Adare sey roja hesabperkerdişî vîneno.”

	 

	Goreyê qerarê Heyetê Weçînayîşî yê Berzî (YSK) ke rojnameyê fermî de weşêna do weçînayîşê herêmî 31ê Adare 2019î de pê bêro. Hemwelatîyê ke bajarê kurdan ke hetê qayûman ra îradeya şar ameye xespkerdiş de cuyenî sey roja hesabperskerdişî nizdîyê weçînayîşî benî.

	 

	Hemsereka Partîya Demokratîke ya Şaran (HDP) ya Wanî Yadîşen Karabulake dîyar kerde ke Partîya Herêmê Demokratîkî (DBP) weçînayîşê 2014î de 14 şaredarîyan ra 2ê ci bi rayanê kêmî vînî kerde û tewrê operasyonê siyasî û tewqîfkerdişan qezencê girdî girewtî û qiseykerdişê xo de wina va: “Heta 7ê Hezîrane 2015î hewayêk pozîtîf bajar de awan bibî. Zihnîyetê rayirberîya herêmî raştê eleqeyêka gird ame.”

	 

	AKP zano do vindî bikero

	 

	Yadîşen qiseykerdişê xo yê peyênan de wina va: “Awankerdişê meclîsan û qerarê ke şarî reyde ameyî girewtiş hetê qayûmê AKPyî ra nêameyî qebûlkerdiş. Badê ke prosesê çareserî qedîya dest bi operasyon û mudaxeleyan kerdî. Bi tayînkerdişê qayûman heme raşteyê cinîyan û komeleyî ameyî padayîş. Hamserekê ma ameyî tewqîfkerdiş. Vernîya ma de weçînayîşê herêmî esto. AKP nika ra zano do vindî bikero. Cok ra tehdîtan keno. 9ê Teşrîna verêne ra nata vera HDPyî de operasyonê siyasî dîyayo dest pêkerdiş. Bi nê operasyonan nêeşkenî ma û partîya ma bipelçiqnî. Ma sond danî embazanê xo ke do no weçînayîş de 14 şaredarîyan zî bigîrî.”