'Berpirsîyarê zêdebîyayîşî îstîsmarê domanan AKP yo' 

2018-10-26 09:14:51


	 

	Dîlan Babat

	 

	ENQERE - Hemsereka Pêroyî ya SESî Gonul Erdene dîyar kerde ke berpirsîyarê zêdebîyayîşê îstîsmarê domanan polîtîkayê AKPî yê û va wezaretê weşîye yê hedîseyê Nêweşxaneyê Kanûnî Sultan Suleyman, berpirsîyar o, bi cezakerdişê çend personelan nêeşkeno xo xelas bikero.

	 

	Serra vîyarte de vejîyabi meydan ke prosesê 5 aşman de Nêweşxaneyê Kanûnî Sultan Suleymanî yê Stenbolî de 115 domanê diganî yê muracatê nêweşxane kerdê, zanayîşê înan mercîyê edlî ra nêameyê neqlkerdiş. Dimayê hedîse reaksîyonê ke ameyî mojnarayîş, Wezaretê Weşîye rapor weşêna û va 5 aşmê ewil yê 2017an de hûmara domanê digane mendê 115, 158 ê. Heto bîn ra ame tespîtkerdiş ke domanê digane mendê yew 12 serrî, 5 heb 13 serrî, 11 heb 14 serrî, 20 heb 15 serrî, 71 heb 16 serrî, 50 heb 17 serrî yê. Goreyê rapor de ca dayî dayeyê serra 2016an zî û a serre zî hezar û 260 domanî digane mendê û 64 heb binê emrê 15î de bîyê. Ame vatiş ke xeylê xo domanê Sûrîye ra bîyê.

	 

	Hemsereka Pêroyî ya SESî Gonul Erdene derheqê dayeyê raporî û nimtişê îstîsmarêê domanan de şîrove kerde.

	 

	'Serrêke de hezar û 260 domanî digane mendê'

	 

	Gonule dîyar kerde ke hewl ameyo dayîş ke hedîseya Nêweşxaneyê Kanûnî Sultan Suleyman bêra nimtiş û la bi reaksîyonê raya pêroyî ameya rojeve û wina va: "Ewil na rewşe ame înkarkerdiş. Dima ra zî waştî serê ci binimnê. Serê israr û reaksîyonan wezaretî tehqîqat da destpêkerdiş. Çend rojî verê wezaretî rapor weşêna. La rapor bi sazgeh û raya pêroyî rê nêame parekerdiş. Goreyê zanayîşan 5 aşman de zî 115 domanî nêy 158 domanî digane mendê û muracatê nêweşxane kerdê. Çîyo tewr xof o yo ke serrêke de hûmara domanê digane yê muracatê nêweşxaneyê Kanûnî Sultan Suleyman kerdê hezar û 260 ê. No zî netîceyê tewr bi xof yê raporî yo."

	 

	Gonule wina dewam kerde: "No tena seba nêweşxaneyêke derbaz nîyo. Ma hedîseyê bîn îstatîstikê bajaranê bînan nêzanê. Wezaret diganeyê ser emrê 15yî de neql nêkerdo. Her kesê binê emrê 18î de domanê. Ganî doman bêrê qebûlkerdiş. Ferzo ke kesê digane yê binê emrê 18yî de mercîyê edlî rê bêrê neqlkerdiş."

	 

	'Berpirsîyar wezaret o'

	 

	Gonule dewam de da zanayîş ke berpirsîyarê hedîseyê ke ameyê cuyayîş, wezaretê weşîye û wina va: "Wezaret bi cezakerdişê çend xebatkaran nêeşkeno xo xelas bikero. Berpirsîyarê nê sucî xebatkar nê wezaret o. Zêdebîyayîşê hedîseyan îstîsmarê domanan zî netîceyê polîtîkayê 16 serrî yê hukmatê AKPî yo."