Rojbîn Çetîne: Helbet hesab bêro perskerdiş 

2018-10-24 14:36:35


	 

	WAN - Hemşaredara Artemîtî ya Wanî Rojbîn Çetîna ke qayûm tayînê herinda aye ameybî kerdişe dîyar kerde ke îdeolojîyê fermî bi qayûman vera îdeolojîyê demokratîk, azadîwaştox û komunalî de şer dayo dest pêkerdiş û û va: “Wexto ke roje bêra do şar hesab biperso.”

	 

	Seke yeno zanayene teşebusê derbe yê 15ê temmuze ra dima 20ê temmuze de rewşa OHALî amey îlankerdene. Prosesê OHALî de her tewir hêriş û bêhuqûqîyî ameyî kerdiş û hemserekê şaredarîyan zî tede bi hezaran kesî erzîyayî zîndanan. Sewbîna bi hezaran kedkarî bi Qerarnameyê Hukmê Qanûnî (KHK) karê xo ra ameyî îxraçkerdiş û qayûmî tayînê herindê 95 hemşaredarê Partîya Herêmê Demokratîkî (DBP) ameyî kerdiş. Nê şaredarîyan ra yew zî Şaredarîya Artemîyî ya Wanî ke se ra 50 rayan girewtbî ya. 

	 

	'Şaredarîya AKPyî xeylê gayrîmenkulan pêşkeşê hetgiranê xo kerd'

	 

	 Hemşaredara Artemîtî ya Wanî Rojbîn Çetîna ka qayûm tayînê herinda aye ameybî kerdişe û 14 aşman zindan de mende, nika xebatanê rêxistinkerdişî dewam kena. Rojbîne daye zanayene ke rayîrberîya herême tewrê şarî planê xo yê stratejîk yê 5 serran dîyar kerdbî û goreyê waştişê şarî xizmet dayêne şar. Çetîne dîyar kerde ke şaredarîya AKPyî ya prosesê înan ra ver xeylê gayrîmenkulan pêşkeşê hetgiranê xo kerdo.

	 

	'Qayûm şewêk de dikanan rijna'

	 

	Rojbîne qiseykerdişê xo yê verênan de qala projeyan kerde û wina va: “Projeyê qeraxê Artemîtî ame sabotekerdiş. Karkerê ke dormeyê qeraxî de xebetîyenî seba ke esnaf nêrî mexdurkerdiş waştî ke raşteyêko alternatîf bêro dîyarkerdiş. La badê ke qayûm ame tayînkerdiş nê dikanî şewêk de ameyî rijnayîş. Qayûm badê 3 serran no proje seke projeyê ci bo da nîşandayîş û rayapêroyî reyde aşkera kerd.”

	 

	'Şar xeylê bi hêrsin o'

	 

	Rojbîne qiseykerdişê xo yê peyênan de bale ante weçînayîşê herêmî ser û daye zanayene ke şar do cewabê qayûman bido û hesab biperso û wina qedênaye: “Mîyanê projeyanê ma de ‘Dewa Domana’ zî estbî. Ma plan kerdê ne ke domanê keyeyê feqîran bierşawî na dewe. La badê ke qayûm ame no raşte kerd cayê mangalî. Ma plananê xo erşawitêne wezaretî ro. La tepîya ameyêne erşawitiş. Seba plan û projeyanê ma, ne butçe û ne zî destûr dayêne. Çimkî ma şaredarîya DBPyî bî. Qayûm senî ke ame tayînkerdiş Mudirîya Polîtîkayanê Cinîyan pada. Cinîyan kar ra eşt. Qayûm temsîlîya seyyewbînanî hedef girewt. Şar xeylê bi hêrsin o. Helbet do rojêk hesab bêro perskerdiş.”