Zeytune zî sey Uzundere xover dana 

2018-10-22 12:51:49


	 

	ÎZMÎR - Dewa Uzundere ya qezaya Karabaglarî ya Îzmîrî 600 serrî yo ke vera modernîtebîyayîşî de sey zeytunan xover dana.

	 

	Dewa Uzundere ya qezaya Karabaglarî ya Îzmîrî 600 serrî yo ke vera modernîtebîyayîşî de xover dana û nika bi polîtîkayanê rantê kerdî hedefê sermayegozaran. Herême bi zeytunanê xo yena naskerdene û emserr zî mehsulê xo daye. Nizdîyê dewe de viraştişê JESî yeno waştiş. Netîceyê xoverdayîşê hemwelatîyan de xebate amey vindetiş. Nika projeyê sewbîna erzîyayî dewre û erazîyêka 86 donimî ser de 30 keye, keyeyê cem û awanîya şaredarî zî mîyan de viraştişê projeyê awanîyê komî yeno waştiş. Hemwelatîyê herême nika zî vera projeyê awanîyê komî de xover danî. Dewijî mîyanê hende zor û zehmetîyan de dest bi arêkerdişê zeytunan kerdî û ronê zeytunan virazenî.

	 

	Cinîya binameyê Zeynep Gura 75 serrî dîyar kerde ke her roje bi 40 TLyî yena hetkarîya cîrananê xo û va: “Krîzê ekonomî vera heqê keda ma nîno dayîş. Rewşa pêroyê dewijan baş nîya. Nêeşkenî berardiş bikerî. Ma dewa xo de bîyî sey meyman.”

	 

	'Zeytunê daxî yenê tehdîtkerdiş'

	 

	Tewr peynî Neslîhan Îlkturke qisey kerde û aye zî wina va: “Seba ke dewa ma nizdîyê merkezîya, hertim raştê projeyan yena. Ma vera projeyan de xover danî. Dorme yeno vengkerdiş û şaredarî xizmetêka baş nêdana. Ma gere û muracatan kenî, la şaredarî çîyêk nêkena. Zeytune daxî yenî tehditkerdiş.”