Reaksîyonê hempar ê kuçeyan: Ez qisey bikerî do bibermê 

2018-10-20 09:24:28


	 

	Safiye Alagaş

	 

	STENBOL - Stenbol de hemwelatîyan derheqê krîzê ekonomî û betalîyê zêde bîyo de qisey kerdî. Hemwelatîyê ke waştî kamera padayebo ya zî nêwaştî nameyê xo bidê û vatî: "Ez çi vajî. Ez qisey nêkerî. Ez qisey bikerî do mi bi tepişnê."

	 

	Goreyê dayeyê Sazgehê Îstatîstîkê Tirkîya (TUÎK) Tirkîya de hûmara betalan 3 mîlyon 409 hezarî ya. Gorey dayeyê eynî sazgehê aşma çele 2018an de serra 2017an aşma çele hûmara betalan mîlyonêke û 357 hezar  zêde bîyê. Reyna goreyê TUÎKî her çiqas bêro vatiş dayeyê îstîhdamî zêde bîyo zî seba krîzê ekonomî esnafan dikanê xo padayê. Xeylê kargerîyan zî peynîya karê xebatkaranê xo dayê. Kuçeyan de şar vera krîzî bi reaksîyon ê. Ma Stenbol de kuçeyan de şîroveyê şarî girewtî. Reaksîyonê hempar ê şarî ‘Ez çi vajî. Ez çî qisey bikerî. Ez qisey bikerî do baş qisey nêkerî û dima ra do mi tepişnê."

	 

	Cinîya ke vilan roşena wexto kamera vînena reaksîyon mojnena ra û vana meance û dimayê ke kamera amî padayîş wina va: "Ez çi vajî. Şima rewşa ma vînenê. Ma bi destê xo kerd. Ma veng da înan, ma meydan de mendî." Cinîyêke bîn zî kuçe ra derbaz bîne zî va: "Ez qisey nêkerî. Ez qisey bikerî do baş nêbo. Do dima ra mi bitepişnê."

	 

	'Tirkîya de kar nêmend'

	 

	Selda Soydemîre ard ziwan ke Tirkîya kar nêmend û wina va: "Mi medê qiseykerdişî. Ez do baş qisey nêkerî. Ma bi maeşêke nêeşkenê derbaz bikerê. Keye kîra yo. Hadî wa çareserîyêke bivînê. Keyeyê mi de kes betal nîyo la embazanê mi mêrdeyê înan betalê. Mêrdeyê mi 20 serrî yo eynî ca de xebityeno. Meaşê asgarî gêno. Kîra bîyê 2 hezar. Ma do senîn bidê. Wa hesab bidê. Gelo çareserîyêke esto."

	 

	Seldaye va dayeyê TUÎKî rastî nêmojnenê ra û reaksîyonê xo wina ard ziwan: "Kîloyê qîymê bîyo 45 TL. Gelo ma çi borê. Wa heban vejê ma heban borê. Ma wina bicuyê. Ma se bikerê? Ez zaf bi hêrsîn a. Ez nika çîyêk vajî do bigîrê zere. No welat vindî kerdo. Heme çî zaf vayo. Ma nêzanê peynîya aşme senîn bîyarê."

	 

	'Derûdorê mi de zaf betalî estê'

	 

	Sevînç Kocamane zî arde ziwan ke xeylê kesê derûdorê ci betal ê û va kesê unîversîte qedênayê zî veng ê û wina va: "Cayê karê mi esto. Xeylê kesî betal ê. Dayeyê betalî zaf zêde yê. Polîtîkayê berardişê Tirkîya çin o. Xeylê fabrîka ameyî padayîş. Heme çî bîyê vay."

	 

	Cinîya ke nêwaşt nameyê xo bido zî reaksîyon mojna zamê ke ameyê û wina va: "Ma zaf krîz ra tesîr bî. Ez cayêke karî de werd viraznena. Pereyê asgarî qîm nêkeno. Ez kar ra vejîya la mecbur menda ke reyna şîrî karê xo. Seba ke meaş kêm bi ez vejîyaya. Ez nêeşkena kredîyê xo bigîrî. Ma şinê market ma nêeşkenê çîyêke bigîrê."