Hamîde Yîgîte: Mutabakatê Îdlibî do sey bobelate agêro Tirkîya 

2018-10-19 15:11:16


	 

	Habîbe Eren

	 

	ENQERE - Pispora Rojhelato Mîyanenî Nuştox Hamîde Yîgîte dîyar kerde ke mutabakato ke Rûsya reyde babeta Îdlibî ser o ameyo kerdiş do sey bobelate agêro Tirkîya. Hamîde derheqê krîzê Rahîp Andrew Brunsonî de zî qisey kerde û va: “Babete babeta Brunsonî nîya. Mesele muhakemeya Tirkîya xoser û nêxoserî ya. Vîşêrê no kayêk yeno kaykerdiş.”

	 

	Operasyono ke Artêşa Sûrîye waşt vera Îdlibî de pê bîyara, mutabakatê Soçî yê ke mabenê Tirkîya û Rûsya de ame îmzakerdiş vera ame taloqkerdiş. Her çiqas ke mutabat bêro îmzekerdiş zî komê selefî Îdlibî ra nêancîyenî. Pispora Rojhelato Mîyanenî Nuştox Hamîde Yîgîte qala rewşa peyên ya Îdlibî û serbestveradayîşê Rahîp Andrew Brunsonî kerde û dîyar kerde ke mutabakato ke Rûsya reyde babeta Îdlibî ser o ameyo kerdiş do sey bobelate agêro Tirkîya.

	 

	'Çek veradayîşê koman asan nîyo'

	 

	Hamîde qiseykerdişê xo de wina va: “Ganî heta 15ê Teşrîna verêne komê selefî Îdlibî ra biancîyayêne. Labelê destpêk de zî dîyar bî ke Tirkîya nêeşkena heta 15ê Teşrîna verêne na babete çareser bikera. Yê ke qebul kerdî wa biancî herêma bê çek Tirkîya bi xo bîye. Problemê yewin o yo ke esasê xo de çek veradayîşê koman asan nîyo. Mutabakato ke Rûsya reyde babeta Îdlibî ser o ameyo kerdiş do sey bobelate agêro Tirkîya.”

	 

	 

	Hamîdeye dewamê qiseykerdişê xo de ke komê çek veradayîşî red kenî  estî û va: “Badê 15 rojan çi wext bêro dayîş wa bêro dayîş, ez texmîn kena ke seba Tirkîya zî do wext bêro ronayîş. Tirkîya her çiqas ke wext derg bikera zî do qezenc nêkera. Prosesê bi pêrodayîş do rojê aver de zelal bibî. Seba berpirsîyarîya ke Tirkîya girewta milê xo ser do wext bêro dayîş û sey bobelate agêro Tirkîya. Her çiqas ke wext bêro dayîş zî do prosesêk krîz û problemin bibo.”

	 

	'Babete Brunson nîya, Tirkîya ra tavîz yeno waştiş'

	 

	Hamîdeye tewr peynî derheqê Rahîp Andrew Brunsonî de qisey kerde û va: “Babete babeta Brunsonî nîya. Mesele muhakemeya Tirkîya xoser û nêxoserî ya. Vîşêrê no kayêk yeno kaykerdiş. Destê înan de kozê xurt estî. Muhakemeya Tirkîya xoser nîya. Girêdayeya talîmat û fermanê Qesrî ya. Merdim nêeşkeno vajo ke DYA seba Brunson bêro veradayîş, vera Tirkîya de operasyon daye dest pêkerdiş.”