Ciwanê Wanijî: Qayûman muhtewaya merkezê kulturî veng kerd 

2018-10-19 10:12:15


	 

	Rengin Azîzoglu

	 

	WAN - Merkezê Kulturê Nuda ke taxa Xaçortê Wanî de yo hetê şaredarîya DBPî ra amebi akerdiş, hetê şarî ra  eleqeyêke pîl dî û 3 serran de bi hezaran kes perwerde kerd. La qayûm ame vernê de nameyê ci vurna û dima ra zî bi pêroyî de bêtesîr verda. Ciwanê ke Wan de cuyenê zî wazenê Merkezê Kulturî newe ra bêro akerdiş.

	 

	Merkezê Kulturê Nuda ke 2012an de taxa Xaçortê qezaya Îpekyolê Wanî de hetê şaredarîya DBPî ra ame akerdiş, dimayê ke qayûm ame tayînkerdiş, bi hedef û ame padayîş. Nameyê ci zî ame vurnayîş û qurs bi pêroyî de ame çinkerdiş. Merkezê Kulturî bi amancê ke vera caardişê tîryakî û  fuhuşî têkoşîn bikerê ame akerdiş. Çarçeweya nê de derheqê cinî û domanan de xeylê semîner û atolye ameyî kerdiş û hetê hişmendikerdişê vera zanebîyayîşê nêbaş xebate ameyne meşnayîş.

	 

	Xeylê beşan de perwerde ame dayîş

	 

	6 beşê sey muzîk, tîyatro, sînema, edebîyat, resim û kayê adetî de qurs ameyî dayîş. Muracatê seba qursan xeylê zêde bî û perwerdehîyê ziwanê maya de zî nêzdîyê 40 mamosteyî wezîfe girewtî.

	 

	Warê muzîkî de, dersê erbane, gîtar, saz, keman, pîyano, kemençe, santur ame dayîş. Heto bîn ra teberê welatî ra zî hunermend ardêne û atolye viraştêne.

	 

	'Mi xeyalê xo yê tewr pîl Nuda de bi ca ard'

	 

	Zozan Bora ke bi akerdişê Merkezê Kulturî dir qeydê xo beşê resmî kerd, wina va: "Ez verê qursî keye de bîya. Xeyalê mi tewr pîl hetê resimî ra xo aver berî. Mi Nuda de wina kerd. Dersê Kuranî xora camîyan de yenê dayîş. Merkezê kulturî de hewce nêkenê. Êdî kes sey verî nêşino merkez. Padayîşê Nuda seba cinî û domanan vindîbîyayêke pîl bi."

	 

	'Dimayê ke ame padayîş ma vengîke de mendî'

	 

	Dîlvîn Abî zî arde ziwan ke Merkezê Kulturî seba ke ame padayîş tesîrêke negatîf serê ci de kerdo û wina va: "Ez vernê de şîya dersa gîtarî û dima ra zî tîyatro. Ez 4-5 aşmî şîya tîyatro û zaf aver şîya ke vejîyê serê sehne la merkez ame padayîş. Ma taxe de bi embazan dir şîne. Dimayê ke merkez ame padayîş ma kewtî vengîke û bi padayîşê merkezî serê nameyê hunerî de çîyêk nêmend."