Tirkîya bê ceza vera dana, Ewropa zî hemwelatîyî ra vejena 

2018-10-17 15:36:07


	 

	Dilan Babat

	 

	ENQERE - Avûkatanê Qetlîyamê Enqere ra Sanem Doganogluye dîyar kerde ke endamê DAIŞî sey Tirkîya Ewropa de zî nînê muhakemekerdişe û yenî veradayîşe û va: “Dewlete muhakemekerdişê çeteyan ra remena.  Ganî muhakeme çarçeweya ‘sucê merdimîye’ de bêra kerdişe.”

	 

	Weçînayîşê 7ê Hezîrane ra dima konseptê îmhakerdişî erzîyabî dewre û xeylê merkezan de qetlîyamî ameybî viraştiş. Înan ra yew zî Qetlîyamê Enqere ke 10ê Teşrîna Verêna 2015î de virazîyabî yo û netîceyê qetlîyamî de 105 kesî ameybî qetilkerdiş û bi seyan kesî zî birîndar bîbî. Avûkat Sanem Doganogluye avûkatanê Qetlîyamê 10ê Teşrîna Verêne yê Garê Anqara ra yew a. Saneme derheqê Qetlîyamê Anqara û prosesê muhakemekerdişê Tirkîya û Ewropa de qisey kerde. 

	 

	'Aqûbetê fîrarîyan dîyar nîyo'

	 

	Saneme destpêkê qiseykerdişê xo de bale ante muhakemekerdişê kesê şikinan ser û wina va: “Tirkîya de qetlîyaman ra dima kesê şikin yew bi yewe yenî veradayîş û aqûbetê xeylê çeteyanê DAIŞî ke ameyî veradayîş zî nîno zanayîş. Sey Tirkîya Ewropa zî endamanê DAIŞî bi hawayo zelal muhakeme nêkena. Sînorê Iraqî ra çend kesî kewtî Tirkîya? Çend kesî ameyî veradayîş? Ma nêzanê. Derheqê gumanbaro tewr muhîn yê Qetlîyamê Enqere Nusret Yilmazî de xeylê dosya estî, la gumanbar fîrar o.  No kes nêame tepiştiş, hewl da Gurcistanî ra biremo. La teslîmê Tirkîya ame kerdiş. Nika derheqê Yilmazî û aqûbetê ci de çîyêk nîno zanayîş.”

	'

	Ewropa nêwazena muhakeme bikera'

	 

	Saneme dewamê qiseyekrdişê xo de va: “Welatê Ewropa gumanbarê DAIŞî nêgêna. Na muhakemekerdişe seba cinîyê endamanê DAIŞî zî derbazdar a. Ma Qetlîyamê Enqere de dîye ke kerdox û kesê şikin ameyî veradayîş. Cinîyê çeteyanê DAIŞî mîlîtan û prosesî rêxistin kenî.”

	 

	'Çete wazenî Tirkîya de bêrî muhakemekerdiş'

	 

	Saneme tewr peynî wina va: “ Şerê Sûrîye vera îmkanê muhakemekerdişê endamanê DAIŞî yê bîyanîyan çin o. Welatê Ewropa zî çareserî nêvînena. Eke biwazî eşkenî bi asanî çareser bikerî. La nêwazenî endamanê bigîrî welatê xo. Tirkîya zî bêveng manena û endamanê DAIŞî muhakeme nêkena. Eke rewşe wina biba çeteyê DAIŞ bi wazenî Tirkîya de bêrî muhakemekerdiş.”