Dayîka Merale ya ke grevê vêşanîye de ya: Bîya 34 kîlo, roj bi roje helîyena 

2018-10-11 13:42:11


	 

	ENQERE - Mamoste Meral Donmeza Hepisxaneyê Tarsusî de hepsîya, seba sewqê hepisxaneyêke nêzdîyê keyeyê xo biba, bi 37 rojî yo grevê vêşanî de ya. Merala ke 45 kîlo ra kewte  34 kîloyan rewşa aye her ke şina xirab bena. Maya aye Sose Donmez wina veng da: "Ganî waştişê aye sewqî bi ca bîyarê."

	 

	La îhlalkerdişê heqan yê hepisxaneyan roj bi roj yê newe zêde benê û îhlalkerdişê wextê surgunan de zî dewam kenê. Meral Donmeza Nîsana 2014an de bi îdiaya ‘endamîya rêxistine ra’ amî tewqîfkerdiş rastê 11.5 serrî ceza amî. Merale seba sewqî hepisxaneyêke nêzdîyê keyeyê xo biba bi 37 rojî yo grevê vêşanî de ya. Meral nika kewta 34 kîloyan. Maya Merale, Sose Donmeze da zanayîş ke ganî grev peynî bibo û waştişê kêna aye bi ca bîyarê.

	 

	'Lazimîyê xo bi tena sereyê xo nêeşkena bi ca bîyara'

	 

	Soseye da zanayîş ke seba kapsulê gazî gina bi sereyê Merale ro, travmayê mezgî derbaz kerda û senîn nêweşxane ra ameya vetiş, ameya surgunkerdiş û wina va: "Seba kapsul gina sereyê aye ro ‘raporê demêke derg nêeşkena raywanî bikera girewte'. Pêwa nê aye eşrawitî hepisxaneyê Tarsusî. Seba ke kêna mi nêeşkena lazimîyê xo bi ca bîyara, wazena şêro hepisxaneyêke embazê aye tede yê. La sewq nêkenê. No semed ra zî 3ê êlule ra heta nika hepisxane de ya."

	 

	'Nêeşkena linge û milêke xo bi xebitna'

	 

	Soseye da zanayîş ke milê aye bîyo sîya û nêeşkena lingê xo yê raste bida erd û wina va: "Gardîyanan kêna mi derb kerda. O wext zaf bi şîdetîn ginena erd ro. Lingê aye tadeyena. Wexto ke milê aye ra gênê kaş kenê zî milê aye beno sîya. Nika nêeşkena milê xo bi xebitno. Nêeşkena lazimîyê xo bi ca bîyara."

	 

	Soseye tewr peyîn wina va: "Kêna mi roj bi roj kîlo vindî kena. Wexto ke hepisxaneyê Şakranî de bî hema bi rapor bî. Pêwa nê surgunê Tarsusî amî kerdene. Ma wazenê kêna mi ganî bieşrawê hepisxaneyêke bîn."