Kesê ke Amed de ameyî tepiştiş 20 ci ra serbest ameyî veradayîş 

2018-10-10 14:46:34


	 

	AMED - 100 kesan ra tewr zêde ke çarçeweya di cêgirayîşê cîya ke merkezê ci Amed de ame meşnayîş de ameyî tepiştiş, 20 ci dimayê cêgirayîşê înan mudirîyê Polîsan peynî bi, serbest ameyî veradayîş.

	 

	Operasyonê çarçeweya cêgirayîşê mabêne serrê 2017 û 2018an ke merkezê ci Amed 9 bajaran de ame kerdiş de, polîsan vizîr serê siba eşt serê xeylê keyan ser û 100 ra tewr zêde rojnameger û siyasetmedar tepişnayî. Kesê ke Êlih, Mêrdîn, Edene, Stenbol û bajarê bînan de ameyî tepiştiş ardî Mudirîyê Polîsan yê Amedî. Neslîhan Karacadag, Leyla Tekdag, Engîn Karabayîgît, (îdarekarê HDPî) Şehmûs Karayil, (îdarekara verê ya HDPî) Muazzez Canpolat, (endama TUHAT-FED) Nalan Ozaydin, (BTS) Veysel Ozektî, (Tum Bel-Sen) Fuat Ozdemîr, Habîbe Ekîncî, Halîse Yavûz, Pinar Siraç Kalkan, Ruken Koyun, Ayşe Koyun, Necla Tanrîş, Nacî Tanrikûlû, Hanim Bîçîmlî, Rûken Akçan, Lamîa Kûmral, Emel Ozgen û Zehra Ozdemîr ke cêgirayîşê înan Mudirîyê Polîsan peynî bi, saetê şanî de serbest ameyî veradayîş.

	 

	Çarçeweya cêgirayîşî de derheqê 151 kesan de qerarê tepişnayîşî amebi dayîş. Operasyonê tepiştişî kesê ke keyeyê xo de nêameyî vînayîş dewam keno.

	 

	Cêgirayîşê rojnameger û siyasetmedarê ke ameyî tepiştiş Mudirîyê Polîsan ê Amedî de dewam keno.