Hepisxaneyê Tarsusî de îhlalkerdişî zêde bî: Cezayê hucreyan zêde bî 

2018-10-10 13:35:03


	 

	EDENE - Hepsîya bi nameyê Dilbirîne ke Hepisxaneyê Cinîyan ê Tarsusî de bi 2 serrî yo tepişnayîya, îhlalkerdişê heqan yê hepisxaneyî qalî kerde û va her îtîrazê înan de rastê teda û cezayê hucre yenê.

	 

	Hepisxaneyê Tirkîya de îhlalkerdişê heqan her ke şinê giran benê. Yew nê hepisxaneyan ra zî Hepisxaneyê Cinîyan ê Tarsusî yo. Hepsîya bi nameyê Dilbirîne bi mektubêke îhlalkerdişê heqan qalî kerde û da zanayîş ke ferzkerdişê hûmartişê serê lingan, cezaya hucre, cezaya odaya sungerine danê.

	 

	Dilbirîne da zanayîş ke mektubê hepsîyan yê ke şîdet û tedayan qalî kenê zî, hetê îdareyî ra bi sebebê ‘bi guman ê’ yenê desteserkerdiş.

	 

	'Şertê hepisxaneyî seba domanan zaf giran ê'

	 

	Dilbirîne dewam de da zanayîş ke Hepisxaneyê Tarsusî yê Cinîyan açeryayo ‘hepisxaneyê domanan' û wina va: "Bi desan domanî uca bi mayanê xo dir manenê. Koxuşa ke ez manena de 2 domanî estê. Ayşe 2 serrî û Ronya zî 1 serrî ya. Bi rastî zî rewşa înan zehmet a. Hewayo germ de bedenê Ronya seba germij î heme bi bîrîn. Şertê hepisxane seba înan zaf zehmet o û ma pê xemgîn benê. Hewce bi pêkay û parkan vînenê. Wexto ke no waştiş bi ca nêro bermenê. Nika 4 odayê ma estê û her oda de domanî estê. Nika Ronya (1), Ayşe (2), Çinar (4), Dersîm û Lîloz bi pêroyî de 5 domanî estê."

	 

	'Heqê pêvînayîşî çin o, werd nînê werdiş'

	 

	Dilbirîne arde ziwan ke pêvînayîşê înan bi OHALî dir saetêke ra ardê nîm saet, dimayê ke OHAL ameyo wedartiş, bi pêroyî de destê înan ra ameyo wedartiş û wina va: "Werd zaf xirab ê. Hepsîyê ke nêeşkenê goşt borê estê. Nê hepsî gerek proteînan bigirê labelê nêgînê û no semed ra nêweş konê."

	 

	Cezayê hucre zêde bî

	 

	Dilbirîne dewamê qiseykerdişê xo de da zanayîş ke xeylê embazê înan sewqê hepisxaneyê bînan ameyî kerdiş û îdareyê hepisxaneyî bi hawayêke kêfî cezayê dîsîplîn danê û wina qalî kerde: "Mayêke û domana aye rastê cêgirayîşê viran ameyî. Maye 3ê Adare de pêvînayîşê telefonî de cilê xo vet û na hadîse protesto kerde. Dimayê protesto na cinî berdî odeya sungerî û 9 rojan uca de mendî. Dimayê uca zî 2 rojan hucre de mende. Xeylê heps rastê eynî caardişan yenê. Cezayê hucre zaf zêde bîyê. Xeylê embazê ma yê hûmartişê serê lingan qebûl nêkenê, rastê cezayê hucre yê di rojan yenê. Na ceza dayî mi zî. Xeylê zehmet bi. Mi ne werd we û ne zî german ra kewta ra. Awa germ nêdayî ke ez çayêke bişimnê. Vatî cezaya to hucre esta."