Komploya mîyanneteweyîye nêqedîyaye: Tecrît nîşanê no yo eşkera yo 

2018-10-09 09:31:07


	 

	AMED - Verfeka KCDî ya Amedî Zelal Bîlgîne derheqê serrgera vetişê Rayberê PKKyî Abdullah Ocalanî ke Sûrîye ra vejîya qisey kerd û dîyar kerd ke komploya mîyanneteweyî 20in serrgera aye de reyke bîn zî hewl yena dayîş ke bikerê.

	 

	Rayberê PKKyî Abdullah Ocalan 9ê teşrîna verêne 1998an de mecbur mend netîceyê komploya mîyanneteweyîye de Rojhelato Mîyanên ra vejîyo. Bi no hewa 15ê Sibata 1999an de teslîmê Tirkîya ame kerdiş û grava Îmraliyê esîr ame  girewtiş. Verfeka KCDyî ya Amedî Zelal Bîlgîne derheqê serrgera komploye de qisey kerde û va hewl yeno dayîş ke komplo reyna bidê cuyayîş.

	 

	'Reaksîyonê ma vera komplo zelal o'

	 

	Zelale da zanayîş ke 20 serrê komploya mîyanneteweyî qedyaya û wina va: "Komplo tesîrêke negatîf serê şaran de kerd. Wexto ke ma komploya 9ê teşrîna verêne eşnawit, ma hîs kerd ke do şer çiqas kûr bibo. Ma zî reaksîyonê xo zaf zelal komplo mojna ra. Ma zaf çalakî viraştî. Xeylê embazê ma ganê xo dayî verê adir. Xeylê kesî kewtê grevê vêşanî. Xeylê cinî a roje cil û belgê sîya danê xo ra û vejîyenê meydanan."

	 

	'Amanc tasfîyekerdişê PKK û şarê Kurdî bi'

	 

	Zelale arde ziwan ke bi komploya mîyanneteweyî dir hedef ame girewtiş ke PKK û şarê Kurd bêrê tasfiyekerdiş û wina va: "Netîceyê komplo de Abdullah Ocalan ame tepiştiş û ardî Tirkîya. Înan hewl da ke îradeyê şarê Kurd bişiknê."

	 

	'Cinîyan tewr pîl reaksîyon mojna ra'

	 

	Zelale wina va: "Heto ke tewr zêde netîceyê komplo ra bi tesîr bî cinî bî. Cinîyan reaksîyon pîl û têkoşînê pîl nîşanê komplo dayî. A roje cinî kuçeyan de bî. Meydanan de bî. Xeylê cinîyan dest bi grev kerd. Bedenê xo dayî verê adir. Ameyî tepiştiş û tewqîfkerdiş. Bi serran o Kurdistan de cinî sîya danê xo ra. Heta komplo dewam bikera do cinî her wext sîya bidê xo ra. Esasê xo de komplo hema dewam kena."