'Cinîya serepêşnaye zî sereakerde zî hedefê îqtîdarî de ya' 

2018-10-09 09:28:14


	 

	RIHA - Endama Şuraya DÎKî Aynur Tîmure da zanayîş ke cografya Îslamî gola gonî de ya û heto bîn ra zî cil û belgê cinîyan, serepêşbîyayîşê û sereakerdişê cinîyan yena munaqeşekerdiş û va: "Cinîya serepêşe ya zî sereakerde nê, cinîya sereyê xo tewinena wazenê. Cinîya ke sere tewênena, îtîraz nêkena wazenê. Yê muxalîfê na rewşe zî hedef yenê girewtiş."

	 

	Meclîsê Cinîyan ê Kongreya Îslamî ya Demokratîke (DÎK) bi bernameyê ke organîze kenê xebatê xo meşnenê. Endama Şuraya DÎKî Aynur Tîmure da zanayîş ke cinîyê vera zîhnîyetê bîyaye têkoşîn kenê hedef yenê girewtiş.

	 

	Aynure arde ziwan ke amancê DÎKî aye ke perdeyo ke ameyo daleqnayîş wedarnê û wina va: "Îslam de munaqeşekerdişê cayê cinîyan lazim o. Cinî û camêrdî têduşt ê. La roja ewro de îqtîdar cinîyan warê cuyayîşî de vejeno teber. Cinî parçeyêke cuyayîş a. Amancê ma aya ke ma cayê cinîyê  Kurdan de vejê teber."

	 

	'Ganî serê ehlaqê komelî ser munaqeşe bêrê kerdiş'

	 

	Aynure tewr peyîn wina va: "Îqtîdar wazeno heme çî bikero binê serdestîyê xo. Bi taybet zî cinîyan. Ma zî vera nê seba cayê cinîyan Kurdan de qalî bikerê, xebityenê. Ma ne cor ne zî cêr de yê. Cinî bi zanebîyayîş nînê qebûlkerdiş. Cografya Îslamî gola gonî de ya û heto bîn ra zî cil û belgê cinîyan, serepêşnayîşê cinîyan û sereakerdişê cinîyan yenê munaqeşekerdiş. Labelê ê tena cinîyê ke sere tewênenê wazenê.  Yê ke muxalîfê na rewşe zî hedef yenê girewtiş. Serê cinîyan de munaqeşeyê ehlaq û îslamî bi problem o, na babetêke polîtîk a."

	 

	Aynure tewr peyîn qiseykerdişê xo de da zanayîş ke Îslam vernîya cinîyan de asteng nîyo, la îqtîdaro bîyaye sey asteng mojneno ra û va vera nê têkoşînê xo meşnenê.