Duzce de îşkence: Mudir û gardîyanî zaf rehet ê 

2018-10-08 09:18:39


	 

	DUZCE - Gulseren Yildirime dîyar kerde ke hepisxaneyê Tîpê T yê Duzce de îşkence vera hepsîyan bîyo sîstematîk û gardîyan û mudir pozîsyonê ‘ma do şima bikşê û çîyêk bi ma nêbeno' de yê. Gulserene eynî wextî de arde ziwan ke bedenê birayê aye de werimnayîş bîyo û 4 rojan odeya sungerî de bi kelepçekerdişî verpay dayê vindertiş, 24 saetan nan û awe nêdayê.

	 

	Hepisxaneyê Tîpê T yê Duzce  bi îşkenceyê askiya filîstînî û odeya sungerî de rojeve de yê. Tewr peyîn Verfeka Weqfê Cigêrayîşê Huqûqî û Komelî (TOHAV) avûkat Rengîn Ergul û Endamê Platformê Huqûqnasê Azadîwaştan (OHP) avûkat Bariş Marhan şî serdayîşê hepisxaneyî û îhlalkerdişê heqan yê 32 hepsî rastê ci ameyê raya pêroyî dir pare kerdî.

	 

	Waya hepsîyo bi nameyê Abdullatîf Teymur, Gulseren Yildirime zî  dîyar kerde ke bi birayê xo dir pêvînayîş kerda û zanayîşê ke pêvînayîş de girewtê qalî kerde.

	 

	'Korîdoran de erd ra kaş kerdê'

	 

	Gulserene arde ziwan ke îşkence bi talîmatê mudirê newe bi ca ameyo û va: "Bi zor sere bi ci tewênayê û erd ra kaş kerdê. Vatê ‘şima merdim nîyê, şima do hêzê Tirkan bivînê. Nameyê mi Kazim Kara yo. Ya ez do şima bikerî merdimî ya zî şima do bimrê'. Bi nê vatişan înan korîdor de erd ra kaş kerdê."

	 

	Odeya bi sungerî de kelepçeyo verpay

	 

	Gulserene da zanayîş ke çaqêke Abdullatîfî de birîne esto û wina va: "Seba ke ma xemgîn nêbê ma ra nêvato. Dima ra va înan nêberdê revîr û her tewir îşkence ro ci kerdê. Mi hewl da ez şîrî verê mudir la qebul nêkerd. Wexto ke benê revîr doktor çira ey şiknayo û vato ê nêeşkenê çîyêk bikerê. Pêwa nê bi zanebîyayîş dayê çaqeyê ey ro. Heme bedenê ey de masnayîş estib. 4 rojan bi kelepçeyê verpay odeya sungerî de mendê. 24 saetan awe û nan nêdayê. Tarîtî de verdayê."

	 

	'Hukmat kam bo sucdar zî ê yê'

	 

	Gulserene da zanayîş ke îşkenceyê vera hepsîyan bîyo sîstematîk û wina va: "Goreyê mi talîmat rayedaran rê yeno. Sey axayan ma dir qisey kenê. Ma şinê verê dozgere ma qebul nêkenê. Ê bi tena sereyê xo nêeşkenê wina bikerê. Kazim Kara Mersîn de zî eynî çî kerdo û dima ra ameyo Duzce. Nika hukmat kam bo sucdar zî o yo. Hepsîyan seba slogan berz kerdê û wextê humartişî de nêwiştê rastê îşkence ameyê. Ganî heme partî seba merdimayî vindertişêke bimojnê. Bi ma tena çîyêk nêbeno. Ma wazenê domanê ma tena nêmanê. Seba ke ê tena seba xo uca de nîyê."