Krîzî tesîr amadekarîyê zimistanî zî kerd: Serrêke do tirşî nêko mitbaxan 

2018-09-27 09:22:53


	 

	WAN - Sezonê yew parçeyê tewr girîng yê amadekarîyê zimistanî ra tirşî dest pêkerd. La seba krîzî do emsar tirşî nêko keyeyan. Canan Durmaza ke her serre bi viraştişê tirşî debara xo kena wina va: "Seba ke tirşî viraznê ez bazar ra nêeşkena sebze bigîra. Wina şêro tena tirşî nê ma do nêeşkê werdêke sebzeyîn zî viraznê."

	 

	Canan Durmaza ke taxa Hacibekir ya Îpekyolê Wanî de cuyena, tirşîya ke her serre çarçeweya amadekarîya zimistanî de viraştêne, emsar do nêeşka virazna. Canana ke hem seba xo û hem zî seba rotişî tirşî viraştêne, emsar seba krîzê ekonomî nêeşkena çîyêk virazna. Canane wina vana: "Sebzeyî zaf vay bîyê. Bi israr vanê ke ‘krîzê ekonomî çin o'."

	 

	 ‘Sebzeyo 1 TL bi nika bîyo 5 TL’

	 

	Canana ke her hewte seba sebze şina bazar wina vana: "Sebze çend aşmî verê kîloyê ci 1-2 TL bi la nika 5 TL yo. Heto bîn ra mi veê tewir bi tewir girewtêne, la nika ez nika nêeşkena di tewir bigîrî."

	 

	'Ez pereyê sebze nêeşkena vejî'

	 

	Canane bi rotişê tirşiyê ewnîyena 3 domananê xo ra û mêrdeyê aye zî înşatan de xebityeno û seba ke sektor vinderto o zî nêxebityeno. Canane wina dewam kerde: "Ez tirşîya xo dikanêke rê roşena. Pereyo ke uca ra yeno şîyayeyê mitbaxe min rê qîm keno. Tirşîya mi heme organîk a. La nika pereyo ke uca ra yeno girewtişê sebzî rê qîm nêkeno. Wina şêro ez do emsar nêvirazna. Ganî no krîz bêro wedartiş."