Cudî de şewatê peyîn de darê fistiqan çin bî 

2018-09-23 09:02:02


	 

	ŞIRNEX - Koyê hewteyêke de di rey şewat vejîya û bi deshezaran hektar war çin bi, bi seyan darê fistiqan zî veşayî.  Dewijan dîyar kerd ke darê înan ke mendibî veşayî û her wext binê nameyê operasyonan de darê înan yenê veşnayîş.

	 

	Wextê peyînan de bi operasyonê leşkerî dir şewatê daristanan de zêdebîyayîş virazyayo. Heta nika şewatê ke vejîyayê bi seyan hektar war çin bîyê û eynî wextî de seba ke nêverdenê mudaxaleyê şewatî bêro kerdiş, adir bi rojan dewam keno. Koyê Cudî yê Şirnexî de rojêke verê şewat vejîya û di rojan dewam kerd. Netîceyê ci de bi hezaran hektar daristan veşayî. Şewat bajar ra zî ameyne vînayîş û nêzdîyê 200 darê fistiqan zî amey veşnayîş.

	 

	'Leşkeran destûr nêda'

	 

	Goreyê zanayîşê ke çimeyê mintiqa ra ameyê girewtiş, bi sebebê operasyon esto bombarduman ameyo kerdiş û dewijê seba tefnayîşê adirî şîyê zî hetê leşkeran ra ameyê vinddenayîş û GBTan ameyo ewnîyayîş. Dewijêke o zî seba tefnayîşî adir şibi dîyar kerd ke war leşker estbîyê û wina va: "Ma senîn şewat dî, ma bi traktor şî. Ma şî mintiqa leşkerî uca bî. Yew zî çîyêk nêkerdêne. Ma qereqole ra seba tefnayîşê adir destûr girewtibi la leşkeran nêverda. Ma tewr peyîn kewtî war û ma ra vatî ‘mintiqayê operasyonî yo, çîyêk bi şima bêro ma nêeşkenê asayîşê şima bigîrê'. Ma şan de adir tefêna la serê siba reyna eynî çi bi."

	 

	Hemwelatîyêke bîn zî ard ziwan ke hema hema her serre darê fistiqan yenê veşnayîş û va: "Her serre yenê veşnayîş. Çend darê ma mendibî. Ma baş ewnîyayne. La bi veşnayîşê daran dir ê zî veyşayî. Eke no ca mintiqayê operasyonî yo o wext ma çira tîya ramitiş kenê, ma her wext yenê tîya?"

	 

	Pêşnûmepers peyser açernayî!

	 

	Parlamenter û îdarekarê HDPyî seba hemverê veşnayîşê şewatan çapemenîya komelî de rojeve viraznê, kewtibî mîyanê hewldayîşî. La hîn çapemenîyan de bi xeberê sey ‘HDPyî hewl danê ke operasyonan asteng bikerê' hedef ame mojnarayîş. Rojê vîyarte de zî parlamentera Şirnexî ya HDPyî Nuran Îmîre zî derheqê şewatan de pêşnûme persek da meclîs la peyser ame açernayîş.