Rewşa hepisxaneyan her ke şino xirab beno: Hepsîyan rê cezaya pêvînayîşî 

2018-09-22 09:16:15


	 

	ŞIRNEX - Hatîce Beyture dîyar kerde ke hepisxaneyê Tîpê T yê Şirnexî, seba reaksîyon vera derbkerdişê hepsîyan mojnaya ra 6 aşmî cezaya hepsî girewta û wina va: "Êdî ma ganî nê ra vajê ‘bes’. Ganî her kes reaksîyon bimojno ra, hepisxaneyan de rewşe her ke şina xirab bena."

	 

	Hepisxaneyê Tîpê T yê Şirnexî ke her wext bi caardişê kêfî û tedayan yeno rojeve, hepsî bi keyeyanê xo dir hetê gardîyanan ra ameybî derbkerdiş. Hepsîyo bi nameyê Ayaz Avşar verê çimê keyeyî seba nîşaneyê serkewtişî kerdib, amebi derbkerdiş û dimayê ke reaksîyon ameybî mojnarayîş zî hedîse dest pêkerdib û bi desan keyeyê ke şîbî pêvînayîş birîndar bibî.

	 

	Derheqê hedîse de cigêrayîş amebi destpêkerdiş û hepsîyê ke ameybî derbkerdiş zî cezayê hucre girewtibî. Keyeyê ke reaksîyon vera derbkerdişî mojnayî ra zî rastê cezayê pêvînayîşî ameybî.

	 

	'Ez poşman nîya'

	 

	Hatîce Beyture dîyar kerde ke wextê pêvînayîşî de seba reaksîyon vera çîyê ke ameyê mojnarayîş daya rastê vatişê gardîyanan ‘vejî teber' ameya û seba ke nêvejîyaya 6 aşmî cezaya pêvînayîşî girewta û wina va: "Her şert û mercî de çîyê ke benê bi ma beno."

	 

	Hatîce çîyê ke a roje ameyê cuyayîş wina va: "Ma hepsî oxir kerdêne. Dima ra hîn dayîkan tilîlî û çepik dayî piro. Hepsîyêke nîşaneyê serkewtişî kerd. Gardîyan pey girewt û kulm da piro û sereyê aye da dês ro. Ma reaksîyon mojna ra û serê ma de ameyî. Mi zî sey keyeyê bîn reaksîyon mojna ra. Keso ke ame derbkerdiş lajê mi nêbi la heme kesê ke zere de bî lajê min ê. Gardîyanan hewl da ma vejê teber. Ver çimê ma de danê domananê ma ro û vanê vejîyê. Mi zî no qebul nêkerd û serê înan de şîya. Kufr kerdêne mi zî reaksîyon mojna ra."

	 

	'Êdî ganî ma vajê bes'

	 

	Hatîce dewam de arde ziwan ke seba reaksîyon mojna ra ya 6 aşmî cezaya pêvînayîşî dayê ci û wina va: "Hewteyo vîyarte de şîya hepisxane, nasnameyê mi girewtî û vatî ‘ti cezakerde ya'. Mi zere ra vetî. Hewteyo bîn ez şîya reyna wina kerdî. Dima ra lajê mi ro mi geyra. Va ‘6 aşmî ceza dayê' Ceza danê la do nêresê amancê xo. Zere de domanê ma ezîyetê pîl ancenê. Bi ma zî wina kenê. Goreyê mi rew ra yo wexto ke ma vajê êdî bes o. Ganî her kes reaksîyon bi mojno ra, hepisxaneyan de rewşe her ke şina xirab bena."

	 

	Heto bîn ra seba 4 hepsîyê ke ameyê derbkerdiş zî cezaya hucre ameya dayîş û dima ra zî cezayê cîya dayê. Keyeyan va dimayê hedîse zî hepsîyan zanayîş nêgirewto.