'Fek dewa ra veradê do meaş şima rê bêro girêdayîş' 

2018-09-20 15:18:35


	 

	ŞIRNEX - Behîye Erenere wextê qedexeyê tebervejîyayîşê kuçeyan ê Sîlopiyî de parçeyê şarapnelî gina sereyê aye ro û cuya xo vinî kerde. Dewaya aye de tu averşîyayîş çin o û kêna aye Ayten Erenere îdia kerde ke înan ra ameyo vatiş ke ‘fek dewa ra vera bidê ma memurtî ya zî meaş şima rê girê bidê.

	 

	Qedexeyê tebervejîyayîşê kuçeyan ê Sîlopî 5ê Nîsana 2016an de ame îlankerdiş, Behiye Erenera 48 serrî netîceyê îsabetkerdişê parçeyê şarapnelî de cuya xo vinî kerde. Domanê Behîye dayî zanayîş ke berpirsî bêrê cezakerdiş muracatê heme rayîrê huqûqî dayê la heta nika tu averşîyayîş nêameyo girewtiş.

	 

	'Seba awe bigîra vejîyabî'

	 

	Kêna Behîyeye, Ayten Erene roja hedîse wina va: "6ê Nîsane bi. Top ameyne eştiş. Di rojan ma nêeşka lazimîyê awe û tuwaletî bi ca bîyarê. Dima ra maya mi seba awe şî baxçe. Vengê topan ame. Yew gina baxçeyê ma ro. Parçeyê ci ginabi sereyê maya mi ro. Her ke ma maya mi kaş kerdêne, înan tewr zêde gulevaran kerdêne. Maya mi destê mi de cuya xo vinî kerde. Tu çîyêke destê ma ra nêame."

	 

	‘Heta ma resay nêweşxane zaf erey bi'

	 

	Aytene da zanayîş ke seba ke destûr nêameyo wesayît bêrê taxe bi saetan dima maya aye berdê nêweşxane û wina va: "Ma nîmeroj şî nêweşxane. Heta ma şî xo ra erey bi. Wexto ke top ameyne eştiş, birayê mi zî sîneyê xo ra birîndar bi. Parçeyê şarapnelî ginabi sîney ey ro. Pêwa nê ma erey resayî Amed. Pêwa ke zanayne ambulans de birîndar estê, her nûkte de cigêrayîş kerdêne. Çend hewte dima qedexeyan ma ancax şî serê gorê maya mi. Waya mi parçeyêke serê gor de dabî ro. Ma uca ra nas kerd."

	 

	Aytene tewr peyîn de da zanayîş ke dewaya maya aye de tu averşîyayîş çin o û îdia kerde ke înan ra ameyo vatiş ke ‘eke şima fek dewa ra vera bidê do memurî û meaş înan rê girê bidê’ û wina va: “Gelo ganê merdiman bi pereyan o. La heta peynî ma pey gonîya maya xo yê. Seba ke kiştoxî bêrê muhakemekerdiş çi destê ma ra bêro ma do bikerê."