Cenazeya Ayşe Buluttekine badê yew serr û nêmî teslîmê keye amey kerdene 

2018-09-19 13:55:55


	 

	ŞIRNEX - Ayşe Buluttekîne seba ke domanê xo yê 6 aşmî rê şit bigîra vejîyaye tebere û 29ê kanûne de bi guleyê sîneyê xo fekê berê xo de amey qetilkerdene. Cenazeya Buluttekîne 10 rojan keye de mende û yew serrî ra dima dîyaye keye. Keye waştiş cenazeya xo bigîro, la bi mehneya ‘aye sivîl nîya’ cenaze nêdîya keye.

	 

	Ayşe Buluttekîne 3 serrî verê cû qezaya Sîlopî ya Şirnexî de prosesê qedexeyê tebervejîyayîşê kuçeyan de cuya xo vînî kerde. Ayşe Buluttekîne seba ke domanê xo yê 6 aşmî rê şit bigîra vejîyaye tebere û 29ê kanûne de bi guleyê sîneyê xo fekê berê xo de amey qetilkerdene. Cenazeya Buluttekîne 10 rojan keye de mende û yew serrî ra dima dîyaye keye. Keye waştiş cenazeya xo bigîro, la bi mehneya ‘aye sivîl nîya’ cenaze nêdîya keye. Babete ser o kênaya aye Hatîce Buluttekîne qisey kerde.

	 

	'Birayê mi xo eştêne serê aye û şit waştêne'

	 

	Hatîce qiseykerdişê xo de qala aye roje kerde û wina va: “Roja yewşeme bîye. Dayîka mi seba ke birayê mi yê 6 aşmî Rustemî rê şit bigîra vejîya teber. Hema fekê berî de bîye vengê qêrayîşî amey. Ez şîya war û mi dîye ke dayîka mi birîndar a. Ma aye berd cor. Gule ginabî sîneyê dayîka mi. Bedenê aye cemidîya û mi fehm kerde ke dayîka mi cuya xo vînî kerda. Cenaze 10 rojan keye de mende. Birayê mi xo eştêne cenaze ser û şit waştêne. Cenaze 10 rojan ra dima keye ra vetî, la destûr nêdayî ma zî şêrî. Mi bi bîberon birayê xo wayîr kerde. Sewbîna çîyêk nêwerdêne. Aye roje ra dima mi dayîka xo nêdîye.”

	 

	'Dayîka 7 domanan bîye'

	 

	Hatîce qiseykerdişê xo yê peyênan de wina va: “Ma cenaze waştêne, la ê ma ra vatêne ‘aye sivîl nîya, terorîst a.’ Ma yew serrî paweyê testê DNAye mendî. Yew serrî ra dima ma cenaze teslîm girewte. Ma bi desar reye muracatan kerde, la heme muracatê ma bi mehneyan ameyî redkerdiş. Dayîka mi cinîyêk dayika 7 domanan bîye. Ma wazenê kerdox û qatilî bêrî aşkerakerdiş û muhakemekerdiş. Ma wazenê edalet pê bêro.”