Keyeyan reaksîyon vera îşkenceyê ke serê cenazeyan de ameyî kerdiş dayî 2018-09-18 12:57:41   AMED - Keyeyan reaksîyon vera îşkenceyê serê cenazeyan dayî û vatî ‘Êdî bes o’ û vengdayîşê hîsgêrî raya pêroyî kerdî.   Îşkenceyê serê cenazeyê şerwanê HPG û YJA Starî yê warê pêrodayîşî de cuya xo vinî kerdî dewam keno. Cenazeyê ke morgan ra yenê girewtiş nînê naskerdiş û destûr nîno dayîş ke keyeyî şînê xo zî ronê. Cenazeyê ke yenê teşîskerdiş bi hewteyan, bi aşman morgan de yenê vindernayîş û nêverdenê ke keyeyî wecîbeyê dînî bi ca bîyarê û wextê definkerdiş de tedayan kenê ke tena çend kes şêrê.   'Pêwa netîceyan ma yenê vindernayîş'   Keyeyê ke vera nê zulmî sere wedarnayî wina vatî: "Îşkenceyê serê cenazeyan qîm nêkeno û caardişê kêfî zî yenê kerdiş. Ma domananê xo nas nêkenê. Ma testa DNAyî kenê pêwa netîce yenê dayîş zî nêdanê ma. Serê maseyan de ma vînenê ke netîce vejîyayê la vanê netîce nêvejîyayê."   'Wa her kes wayîrê cenazeyan vejîyo'   Keyeyan da zanayîş ke wexto ke şinê seba girewtişê cenazeyan rastê heqeretan yenê û wina vatî: "Rojê vîyarte de Meletî ra cenaze ame la nêverdayî kes şêro. Ma şî Qoser şîn. Şîn hewşê keyeyî de amebi ronayîş. Vatî do destur nêdê nê zî. Nêverdenê cenaze camîyan de bêrê şiştiş. Nêverdenê ma keyeyê şînî bi xebitnê. Ma bi domananê xo serberz ê. Se kenê wa bikerê ma do şînê xo ronê. Ma veng danê raya pêroyî ke her kes wayîrê cenazeyan vejîyo."   200 cenaze yenê vindernayîş   Goreyê zanayîşê ke ameyî girewtiş morgê Sazgehê Tipê Edlî yê Meletî nêzdîyê 200 cenaze estê û cenaze goristanê bêkesan de zî ameyî definkerdiş. Amed de zî goristanê bêkesan de cenazeyê 23 kesan esto.