Polîtîkayê Tirkîya yê Îdlibî: Komê ke ameyî wayîrkerdiş do porobleman bivirazî 

2018-09-14 15:20:50


	 

	ÎZMÎR - Parlementera HDPyî Serpîl Kemalbaye dîyar kerde ke badê zîrveya Tahranî, Serekomar Tayyîp Erdoganî bi fekê xo îtîraf kerdo ke hetkarî dayî DAIŞ û komê girêdayeyê ci û wina domna: “Nê rêxistinê ke Tirkîya wayîr kerdî, do seba şarê Tirkîya problemê neweyan bivirazî”

	 

	7ê êlule de Rûsya, Tirkîya û Îran seba rojeva vera Îdlîbî ameybî têhet û kombîyayîşêk viraştbî. Zîrweya ke Tahranî de ame viraştene ra dima 3 hedîseyî qewimîyayî. Îran hêrişê qezaya Koyê kerdbî, Tirkîya hêrişê herêma Baleketî kerdbî û hêzê Esadî zî Qamişlo de hêrişê Hêzê Asayîşî kerdbî. Înan ra dima ame fam kerdene ke kombîyayîşê Tahranî de qerarê qezencê kurdan do bêrî hedef girewtene, girîyayî.

	Parlementera Partîya Demokratîke ya Şaran (HDP) Serpîl Kemalbaye qala kombîyayîşê Tahranî ke Rûsya, Îran û Tirkîya zî tewrê ci bîyî, kerde û dîyar kerde ke AKP reyna nîşan dayo ke êdî nêeşkeno no prosesî îdare bikero. 

	 

	'Tayîp Erdogan cîhadîstan pawit'

	 

	Serpîle destpêkê qiseykerdişê xo de daye zanayîş ke hêzê serdest yê Tirkîya seba ke îqtîdarîyê xo xurt bikerî gaman erzenî û têkilîya çeteyan û îqtîdarê AKPyî kombîyayîş de reyna vejîya raste û wina dewam kerde: “Çîyo ke Tayîp Erdogan îfade kerd no yo. Xo sey hetgir nawit û xo hetê cîhadîstê Îdlibî de nîşan da. Hewl dano no kayî dewam bikero, la tîya de zî hetê çinbîyayîşî ra şono. No proses tesîrê xo dano têkoşînê aştîye û demorasîya Tirkîya, awankerdişê maseya pêkerdişê Sûrîye, awankerdişê prosesê çareserî û demokrasîye zî. Şarê kurd beno asteng û sewbîna zî komê cîhadîstî Tirkîya de benî sebebê problemê neweyan.”

	 

	'Berpirsîyarê cenazeyê ke Îdlibî ra bêrî Tirkîya ya'

	Serpîle dewamê qiseykerdişê xo de va ‘HDP hetkarî dayo prosesê demokrasî yê Tirkîya’ û domnaye: “Ganî şarê kurd xo bi xo îdare bikero û çareserîya aştîyane, muzakere û demokrasîye awan bikero. HDP polîtîkayê pelçiqnayîşî reyde rî bi rî mend. Îdlibî de 12 noqtayê kontrolî yê aîdê Tirkîya estî. Nê operasyon û waran de do reyna domanê şarî bimirî. Berpirsîyarê cenazeyê ke Îdlibî ra bêrî Tirkîya îqtîdaro siyasî yo. Îqtîdar reyna nîşan dayo ke êdî nêeşkeno no prosesî îdare bikero.”

	 

	'Tirkîya ameya peynîya prosese'

	Serpîle qiseykerdişê xo yê peyênan de wina va: “Tirkîya ameya peynîya prosese. Polîtîkayê aştîye do sey polîtîkayê HDPyî dewam bikerî. Ma do vera faşîzmî de têkoşîn bidî û ma do payan ser de bibî. Ma serranê 80 û 90an dîye. Do no proses zî peynî de bimano. Ma piştî danî çareserîya aştîye û demokratîke.”