Do xoza vera nê zulmî xover bida 

2018-09-11 10:18:19


	 

	AMED - Endama Komîsyonê Bawerî û Heqî ya HDPyî Çîlem Kuçukkeleşe dîyar kerde ke sey perçeyêke qirkerdişê kulturî yê bi seserran o vera Elewîyan yeno kerdiş Dêrsim de daristan yenê veşnayîş û va: "Na xoza do bi xo vera nê zulmî bivejîya. Darî hezar rey zî bêrê veşnayîş do reyna serê herre de gane bibê."

	 

	Endama Komîsyonê Bawerî û Heqê yê HDPyî Çîlem Kuçukkeleşe derheqê şewatê daristanan yê Dêrsimî dewam kenê şîrove kerde. Çîleme da zanayîş ke Elewîyan cografyaya Anatolî heta cografya dinya, seba pawitişê bawerîya xo bedelêke pîl dayê û vera îqtîdarî, nêheqî, teda û zulmî têkoşîn meşnayê.

	 

	Çîleme da zanayîş ke Elewî her wext vera zulmî têkoşîn meşnayê û qetî nêwaştê bibê îqtîdar û wina va: "Bawerîya Elewîyan de na dinya dergehêke ya û her bîyayîşê na dinya ganeya. Wexto ke ma vatêne ganê kerra esta zanistan îspat kerd wina ya. Kerra zî heme hucreyê nê dergahî de bi erj a. La bawerîyêke wina her wext yeno waştiş bêro talankerdiş. Ewro reyna rojeyê şînê 12 Îmaman nêzdî beno û Dêrsim de reyna şewat esto."

	 

	'Merkezê bawerîyan ameyî talankerdiş'

	 

	Çîleme hêrişê vera merkezê bawerî zî ard vîr û va Dêrsim de merkezêke bawerî ameyo desteserkerdiş û talankerdiş. Çîlemr wina va: "Hêrişê dewlete êdî bîya sîstematîk. Her hamnan Dêrsime yena veşnayîş. Dêrsim merkezê bawerîyê şarê Elewîyan. Her dara ke yena veşnayîş yena manaya veşnayîşê Seyîd Riza. Na xoza do vera nê zulmî wayîrê xo vejîya."