Dayîkê Şemeyî ra Hanim Tosune: Şima çira bêvengîya ma ra tersenê? 

2018-09-09 12:37:28


	 

	STENBOL - Dayîka Şemeyî Hanim Tosune persa çalakîya roniştişî ke şertê tewr zehmet de viraznayê çira nika ameya qedexekerdiş kerde û wina va: "Her kes zano çalakî çalakîyêke bêveng a. Ma zî fam nêkenê çira bêvengîya ma ra tersenê?"

	 

	Dayîkê Şemeyî bi 23 serre yo Warê Galatasayî de çalakîya roniştişî kenê û aqûbetê merdimê xo yê tepiştiş de ameyê vindîkerdiş pers kenê. Wezaretê Karê Zereyî bi serran o dayîkan nêvîneno û nêeşnawêneno çalakîya înan 700ine bi sebebê asayîşî qedexe kerd. Yew nê dayikê ke beşêke emrê xo Warê Galatasarayî de derbaz kerda zî cinîya Fehmî Tosun, Hanim Tosun a. 

	 

	'Ma qetî fek têkoşîn ra vera nêda'

	 

	Hanimê da zanayîş ke rojê tewr zor yê OHALî de çalakîya xo viraştê û wina va: "Qedexekerdişê çalakîya ewro ma rê normal nêame. Seba ma heme çî ameyo qedexekerdiş. Ma rojê zehmet cuyayî. 1996an de mudaxale kerdî. Ma ameyî tepiştiş. Kutikan vera dayî ma. La pêwa heme tedayan ma fek çalakîya xo ra vera nêda. Ma hewl da ke ma vengê xo bidê eşnawitiş."

	 

	'Ma do peyser game nêerzê'

	 

	Hanimê veng da selahîyetdaranê AKPî û va: "Ma zî înan ra wina vanê; Çira demêke derg o ma ûca nişnenê ro? Wextê OHALî de no war nêame qedexekerdiş, çira ewro ameyo qedexekerdiş? Ma nêzanê do siba se bibo. Ma do reyna her hewte verê xo bidê Warê Galatasarayî. Ma do her hewte aqûbetê kesêke pers bikerê. Ma uca zirar nêda kesêke. Ma heqaret kesî rê nêke. Ma tena vindîbîyayeyanê xo wazenê. Çalakîya Dayikê Şemeyî çalakîyêke bêveng a. Me nê dejî antê ma nêwazenê kesê bîn biancê. No seba ma girîng o. Wa her kes destê xo bido serê wijdanê xo. Îzahatê wezîrê karê zereyîn Suleyman Soylu û verfekê AKPê Omer Çelîk  seba ma girîng nîyo. Ê senîn ma cidî nêgînê ma zî vengê înan nêeşnawenê. Ma do reaksîyonê xo yê heqdar bimojnê."

	 

	'Ez 9 serre ya xo ra Warê Galatasarayî de ya'

	 

	Kêna Huseyîn Taşkaya ke 1993an de tepiştiş de ame vindîkerdiş, Serpîl Taşkaya zî caardişê vera çalakîya înan sey ‘şermê Tirkîya’ bi name kerde û nê çî va: "2011 de pêvînayîş bi serekwezîrê wextî Tayyîp Erdogan dir ame kerdiş. O wext serekwezîrî ma ra va 'Ma dejê şima pare kenê'. Ey hêvî da ma. Rojo ke mudaxale ame kerdiş, ez bi kêna xo dir uca de bîya. Ma tîya ra tepya nêzanê do se bibo. Do seba ma eynî çî bo. Ma do her wext gorê merdimanê xo bigeyrê. Wexto ke ez ameya no war ez 9 serrî bîya. Tîya ra tepya zî ez do domananê xo dir tîya bî."