Dest bi viraştişê dims û bastêq ame kerdiş 

2018-09-07 12:16:42


	 

	Duygu Cînîvîz

	 

	SEMSÛR - Semsur de her serre peynîya aşma Tebaxe de engure rezan ra yena komkerdiş û û bi keda cinîyan dims û bastêq yenê viraştiş. Cinî dîyar kenê ke komkerdişê engure ra bigîrê heta viraştişê heme berardişan ê kenê û na rewşe ra bi gazinc ê.

	 

	Seba viraştişê dimsê Semsurî beroş ameyî ronayîş. Seba ke dims û bastêq bêrê viraştiş mintiqa de xebatêke pîl yena meşnayîş. Fîlîz Yucela ke Mezrayê Çemê Kahta yê qezaya  navçeya Kahta de cuyena, hem viraştişê dimsî û hem zî problemê seba rolê zayendê komelî yenê cuyayîş qalî kerde.

	 

	'Vernê de engure yena pakkerdiş' 

	 

	Fîlîze dewamê qiseykerdişê xo de arde ziwan ke hetê tewr zehmet yê karî komkerdişê engure yo û viraştişê  dims û bastêqî yo û wina va: "Ma engure xo rez ra kom kenê. Ma ê pakî mîyan ra gênê û ma kenê kîsan. Ciwanî engure esernenê. Dima ra ma awa engure girnenê, kenê dims ya zî bastêq."

	 

	'Serê siba dest pêkeno heta rakewtiş dewam keno'

	 

	Fîlîze da zanayîş ke serê siba saete 06.00an de dest bi kar kenê û heta rakewtiş dewam kenê û qiseykerdişê xo wina dewam kerde: "Bi rojan ma dims viraznenê. Şan de zî ma bastêq wedarnenê. Aşma Êlule de ma engurê ke kom kenê, mîyanê 4-5 rojan de ma pak kenê, girnenê û wişk kenê. Na mabêne de heywanan ma ewnîyenê, karê keyeyî ma kenê, werd amade kenê, pakîye keyeyî kenê û meymanan dir eleqeder benê. Hetê tewr giran ê karî serê milê cinîyan de yo. Camêrdî tena esirnayîşê engure de hetkarî kenê. No zî heme bêdadîyê serdestîyê camêrdan ra yeno meydan."