Seba çop û boye merdimî nêeşkenê kuçeyê Sûrî ra derbaz bibê 

2018-09-04 11:39:44


	 

	AMED - Şarê Sûrî dîyar kerdî ke şaredarîya qayûm tayînê ci bîyo la xizmetê taxan nêmeşneno û dîyar kerdî ke seba çop û boye merdimî nêeşkenê kuçeyê Sûrî ra derbaz bibê.

	 

	Qezaya Sûrî yê Amedî ke dimayê qedexeyê tebervejîyayîşê kuçeyan de rastê texrîbatêke pîl ame, dimayê ke qayûm tayînê şaredarî bi, narey zî açerya sergo. Dimayê tayînkerdişê qayûm xeylê kes kar ra ameyî eştiş û seba kêmasîyê xebatkaran kuçeyî baş nînê pakkerdiş. Yeno dîyarkerdiş ke bi di aşmî yo taxan ra çop nîno komkerdiş û taxî nînê pakkerdiş. Taxê Îskendar Paşa, Melîkahmet û Dabanoglu her ca mîyanê çopî de mendo û şar vera nê bi reaksîyon o.

	 

	'Ma bimrê zî xemê înan nîyo'

	 

	Cinîya bi nameyê Fatma Kaya Alpe da zanayîş ke xeylê taxî mîyanê çopî de mendê û boy danê. Fatma wina va: "Ma tersenê ke domanî nêweş bikoyî. No semed ra ma nêvejenê teber. Ma bi îmkananê xo kuçeyanê xo pak kenê, çop wedarnenê. La qîm nêkeno. Boye ra ma nêeşkenê vejîyê teber. Şaredarî weşîye ma nêfikrîyena. Ma bimrê xemê înan nîyo."

	 

	Elîf Emele zî arde ziwan ke seba çop nîno komkerdiş, boyêke xirab taxan ra yena û wina va: "Boye heta zereyê keye yena. Ma nêeşkenê zere de ronişnê. Şaredarî nêxebityena."

	 

	Zuhal Ozkirici zî reaksîyon mojna rewşe û arde ziwan ke seba çop nêeşkenê çîyêk bikerê û ganî şaredarî mudaxaleyê rewşe bikera.