'Ganî seba Dêrsimî reaksîyon bêro nîşandayîş' 

2018-09-03 15:18:38


	 

	WAN - Dêrsim de daristanî veşenî û heta nika bi hezaran dolimî daristanî veşayî. Qezayê Pulur, Çemîşgezek û Xozatî de xeylê nuqtayanê cîyayan de operasyonê leşkerî estî û netîceyê operasyonan de şewatê daristanî dest pêkerdî. Şewatî demêko derg o ke dewam kenî. Vera veşayîşê daristanan de her ke şono reaksîyonî zêde benî.

	 

	Babete ser o Verfekê Hereketê Ekolojîya Mezopotamya Seher Kadîroglu Ataşe qisey kerde û dîyar kerde ke pêroyê dinya de şewatê daristanan bi destê merdiman, kîbrît, cigara û sewbîna çîyê bi adirin ra pê yeno, la Kurdistan de wina nîya û rewşêk cîya esta. Sehere qiseykerdişê xo de daye zanayîş ke Kurdistan de bi destê sîstemî şewat yenî vetiş û seba hewnakerdiş û mudaxalekerdişê şewatan destûr nîno dayîş.  

	 

	'Nêwazenê kesê zerrîwaşteyî mudaxele bikerê'

	 

	Sehere qiseykerdişê xo wina domnaye: “No polîtîkayê asîmîlasyon ûbêmerdimkerdişî yo. Wazenê herêmê ke tede faalîyetî estî, veng bikerî. Qezaya Çelê ya Colemêrgî de rasteyêk dergê ci yew kîlometre û hîrayeyê ci 600 metre erd veşîya û şewat di rojan dewam kerd. Dewijî waştî ke şêrî mudaxaleyê şewatan, la destûr nêdayî. Çewlîkî de zî daristanî ameyî veşênayîş. Ewja de zî destûr nêdayî dewijêk zerrîwaştox û aktîvîstêk şêrî hewnakerdişê şewatî.”

	 

	'Ganî reaksîyon xurt bêro dayîş'

	 

	Sehere qiseykerdişê xo yê peyênan de wina va: “Dêrsim zerrîya Kurdistanî yo û şewat dewam keno. Dêrsimî de netîceyê qereqol û kalekolan ra eştişê top û hawanan şewat vejîya. Doreyê îzehetê embazanê ma şewat hîra bîyo. Çapemenî de vanê tena vaş veşîya yo, la raşt nîyo. Xeylê tewirê gandaran çin bîyî. Ganî seba Dêrsimî reaksîyon bêro nîşandayîş û bikewo rojeva dinya.”