51 serrî yo tapoyê awanîyê dewan nînê dayîş 

2018-09-01 16:02:09


	 

	WAN - Qayûmo ke tayînê şaredarîya Artemêtî ameyo kerdiş, hewl dest birono awanî û ersayê dewijan û înan dewa ra bivejno. Dewijî reaksîyon nîşan dayî nizdîbîyayîşê qayûmî ro û dayî zanayîş ke se beno wa bibo ê do herra xo nêteriknî.

	 

	Dewijê dewa Îşxanikomî ya Artemêta ya Wanî 51 serrî yo ke tapoyê awanîyê xo wazenê, la tapoyê awanîyan înan nînê dayiş. Qayûmo ke tayînê şaredarîya Artemêtî ameyo kerdiş, hewl dest birono awanî û ersayê dewijan û înan dewa ra bivejno. Dewijî reaksîyon nîşan dayî nizdîbîyayîşê qayûmî ro û dayî zanayîş ke se beno wa bibo ê do herra xo nêteriknî. Babete ser o dewijan ra Asya Nazli, Seyran Nazli û Pîroze Nazliye qisey kerdî.

	 

	'Qayûm ma rê vano; ganî şima kîraya awanîyê ke tede ronişenî bidî'

	 

	Asya Nazliye qiseykerdişê xo de wina va: “Qayûm ma mexdur keno. ganî tapoyê awanîyê ma bidîyî ma. m ana dewe de ameyî dinya û ma do heta peynîya emrê xo tîya de bicuyî. Dewa ma hetê pîr û kalikanê ma ra ameya awankerdişe. Ma dewa xo de xeylê çîyan cuyayî. Ma mîyanê xeylê şert û mercê zehmetinan de awanîyanê xo awan kerdî. Bi serran o ma tapoyê awanîyanê xo wazenî. Ma xeylê reyan muracatê şaredarî kerde. La çareserî ra hîna zêde ma rastê astengîyan ameyî. Her yew keye seba herînayîşê tapoyan 6 mîlyar dayî, la tapoyan nêviraştî. Qayûm ma rê vano; ganî şima kîraya awanîyê ke tede ronişenî bidî ma. Kamî ca de ameyo dîyîş ke merdim kîraya keyeyê xo bido. Ma do heta peynî têkoşîn bidî."

	 

	'Ma na rewe qebul nêkenî'

	 

	Seyran Nazliye zî arde ziwan ke bi serrran o peynîya tapoyê awanîyê xo de gêrenî û wina domnaye: “Ma do awanîyê xo nêdî qayûmî. Domanîya ma tîya de derbaz bî. Tîya herra ma û dewa ma ya. Nika yenê ma rê vanê; ya şima do kîraya awanîyan bidî, ya zî şima do veng bikerî. Wexto ke pîr û kalikê ma ameyê na dewe kerra kerra sero çin bî. Dewa ma şert û mercê zehmetinan de ameya awankerdiş. Qayûm wazeno ma awanî û herra xo biroşî. Ma na rewe qebul nêkenî. Dewe de 506 keyeyî estî. tapoyê 30 awanîyan çin o. Ma tapoyê xo wazenî.”

	 

	'Ma destûr nêdanî dagirkerî'

	 

	Cinîyan ra tewr peynî Pîroze Nazliye qisey kerde û wina va: “Hukmat bi zanayîş ma xapêneno. Ma herra xo nêteriknenî. Ma herikîyayîşê rubarî ra heta tebîetî heme çîyê dewe ra berpirsîyar î. Tîya herra ma ya. Wa dewlete destê xo yê lêşinan herra ma ra bianca. Bi serran o ma muracatan kenî. La tapoyê ma nêdanî. Wazenî herra ma dagir bikerî û projeyê xo bikerî merhela. Ma do xover bidî û destûr nêdî herra ma bêra dagirkerdiş.”