Hemseraka TEV-DEMî Zelal Ceger: TEV-DEM seba aştî û demokrasî xebitîyeno 

2018-08-31 14:30:21


	 

	Devrîm Amed-Rojda Seyîtxan

	 

	QAMIŞLO - Endama Hemsereka Tevgerê Komelê Demokratîke (TEV-DEM) Zelal Cegere derheqê pê ardişê 3. Kongreya TEV-DEMî de qisey kerde û bale ante bedilnayîşan ser û va: “TEV-DEM seba aştî û demokrasî xebitîyeno.”

	 

	Tevgerê Komelê Demokratîke (TEV-DEM) ke 16ê Çileyê 2011î de awan bî, seba averberdişê komelê polîtîk û ehlaqî kongreya xo ya 3. pê ard. TEV-DEMî heta nika xeylê dezgeyê demokratîke aver berdî û komun û meclîsanê taxe, bajar, ziqaq û dewe awan kerdî. Kongre de xeylê bedilnayîşê newe virazîyayî û TEV-DEM seba perwerdekerdişê komelî xo newera rêxistin keno.

	 

	Babete ser o  Endam û Hemsereka Tevgerê Komelê Demokratîke (TEV-DEM) Zelal Cegere qisey kerde û qiseykerdişê xo de bale ante bedilnayîşê ke kongreya 3. ya TEV-DEMî de virazîyayî ser.

	 

	'Hetê rêxistinbîyayîş de zaf aver şî'

	 

	Zelale destpêkê qiseykerdişê xo de wina va: “Ma destpêkê prosesê Şorişê Rojawanî de serra 2011î de TEV-DEMî awan kerde. Prosesê awankerdiş û weçînayîşî xeylê hîssin bî û xoverdayîşêk tarîxî estbî. La ma rexistinbîyayîşî esas girewtêne. Ma pêroyê Sûrîye de xo rêxistin kerde. Beşê îdareyî de kesê ke eşkenê piştî bidî komelî ameyî bicakerdiş. Seba kem a komelî rêxistin bikerî, ma şîyî pêroyê keyeyan. TEV-DEM hetê rêxistinbîyayîşî de zaf aver şî. Xo resna heme şenik û kesê pîlan. Pêroyê dinya de cinîyî se ra 10 mîyanê karî de ca gênî, la mîyanê TEV-DEMî de se ra 50 cinî estî. Ma perspektîfê rayberî esas gênî û ma do kotaya se ra 50î zî derbaz bikerî. Cok ra ma mîyanê TEV-DEMî de sîstemê hemserekî da awankerdiş.”

	 

	'TEV-DEM hetê perwer de wayîrê rolêke girîng o'

	 

	Zelale dewamê qiseykerdişê xo de sîstemê perwerdeyî ser û wina dewam kerde: “Akadamîyê ma goreyê îmkanê şarî yî. ganî heme beşê komelî de şorişê fehm û zihnîyetî pê bêro. Eke şorişê fehm û zihnîyetî aver nêşêro do komel apey bimano û ma do nêeşkî Sîstemê Netewê Demokratîke awan bikerî. TEV-DEM temsîlkaranê xo perwerde keno û erşaweno Rayibertîya Xoser. Ma waştêne ke serra 2014î de nê bedilnayîşan bivirazî, la şer estbî û îmkanê ma yê dayîşê qerraran çin bî. Heme kes bi wesîleya TEV-DEMî Rojawanê Kurdistanî şinasna.”

	 

	'Beşê komelî hetê TEV-DEMî ra bêrê îdarekerdiş'

	 

	Zelale qiseykerdişê xo de qala sebebê bedilnayîşê sîstemê TEV-DEMî zî kerde û wina domnaye: “Serra 2018î de ma resayî no qenaatî ke ganî no sîstemî de bedilnayîşî bivirazîyî. Ma meclîs û komînan dewrê Xoserîya Demokratîke kerde û beşê siyasî do hetê Meclîsa Surîye ya Demokratîke (MSD) ra bêrî îdarekerdiş. Beşê komelî zî do hetê TEV-DEMî ra bêrî îdarekerdiş.”

	 

	'TEV-DEM temînatê şaran o'

	 

	Zelale qiseykerdişê xo yê peyênan de wina va: “TEV-DEM do bi fehmê Netew-Demokratîke komel û ciwanan perwerde bikero û înan tewrê komelî bikero. TEV-DEM pawitişê Netewê Demokratîke keno. TEV-DEM do vera kapîtalîzm û netewpesertî de sîstemê Netewê Demokratîke bipawo. Pêroyê komeleyan mîyanê meclîsî de ca gênî. TEV-DEM seba aştî û demokrasî xebitîyeno.”