Necla Şengul: Vera israrê şerî yê dewlete ma do aştî de israr bikerê 

2018-08-30 09:23:04


	 

	ÎZMÎR - Îdarekera ÎHDî ra Necla Şengule dîyar kerde ke do vera îhlalkerdişê heqan yê OHALî de zêde bîyê û çalakîya Dayikê Şeme xo de dayê teber, têkoşînê înan do dewam bikerê û ardî ziwan ke do vera israrê şer û înkarî yê dewlete de israrê înan yê aştî dewam bikero.

	 

	Tesîrê şer û tedayê îqtîdarê AKPyî bi rejîmê yew kesî xo kerd cuyayîş tewr zêde heqê merdiman îhlal keno. Hêrişê vera 700 çalakîya Dayikê Şemeyî yew nimûneyê înan ra yo. ÎHD serrê 90an ra heta nika vera nê têkoşînê xo dewam keno. Endamê Pêroyî yê ÎHDî Necla Şengule arde ziwan ke ganî pawitoxê heqê merdiman seba aştî rê tewr zêde piştdayîş bidê ÎHDî.

	 

	‘Ma reyke bîn dişminîyê dewlete yê vera aştî dî'

	 

	Necla dewamê qiseykerdişê xo de arde ziwan ke aştî bi qasê heqê cuyayîşî girîng o û va ê taqîbkerdoxê îhlalkerdişê heqê merdiman yê Tirkîya û Kurdistanî yenê cuyayîş yê û wina va: "Bi qedênayîşê prosesî dir girîngîyê aştî reyke bîn xo veto meydan. Na rewşe reyke bîn zî mojna ra ya ke selahîyetdarê dewlete dişminê aştî yê."

	 

	‘Sozê seba dayîkan ameyî dayîş xo resnayî vatişê heqaretî'

	 

	Necla da zanayîş ke pawitoxê heqê merdiman binê tedayan de yê û wina va: "Derheqê xeylê îdarekarê komeleyî de dewa ameyê akerdiş. Verê Tayyîp Erdogan veng da mayan û va ‘Do gorê domananê şima bêrê vînayîş'. Îzahatê wezîrê Karê Zerreyî zî merdiman dejneno û qet wezîrêke nîno. No îzahat hetêk ra zî şîroveyê dewlete yê vera Dayikê Şeme û Dayikê Aştî mojneno ra. Çîyêke bivurnê çin o. Sozê ke înan seba dayîkan dayî bi heqeret peynî bi. Ma pawitoxê heqê merdiman zî israrê xo hetê aştî de dewam bikerê."

	 

	‘Tirkiye de şer yeno înkarkerdiş'

	 

	Necla tewr peyîn qiseykerdişê xo de bale ante ser şerê ke bi serran o yeno meşnayaîş û arde ziwan ke şer bi serran o yeno înkarkerdiş û sey babetêke mintiqa yeno mojnarayîş. Necla da zanayîş ke do pawitoxê heqê merdiman seba ke aştî bêra, xeta têkoşînê hîra bikerê.