'Şewatê daristanan netîceyê polîtîkayê AKPyî yo' 

2018-08-24 11:44:36


	 

	AMED - Îdarekera HDPyî Mehtap Metîne dîyar kerde ke şewatê daristanan yê Kurdistanî netîceyê polîtîkayê hukmatê AKPî yo û wina va: "Dişminê xozaya Kurdistanî yê. Gerek heme şarê kurd wayîrê xozaya Kurdistanî vejîyê."

	 

	Qezaya Licê, Pasûr û Farqînê yê Amedî, Mêrdîn, Şirnex û Dêrsim de netîceyê operasyonê leşkerî de şewatê daristanan vejîyenê û hema dewam kenê. Qezaya Xozatî yê Dêrsimî ro Alîbogaz de netîceyê top û bombardumanî de şewat vejîyabi û 3 hewteyan dewam kerd. Netîceyê têkoşînê şarê Dêrsim û sîyasetmedarê kurd de şewat kerdî binê kontrolî. Pêwa heme pêvînayîşê bi hemwalîtîyan dir seba tefnayîşê adir helîkopter nêame eşrawitiş û bi hezaran ganeyî merdî.

	 

	'Vera xozaya Kurdistanî bi kîn ê'

	 

	Îdarekera HDPyî Amedî Mehtap Metîne dîyar kerde ke şewatê babeta vatişî de polîtîkayêke şer yê vera çinkerdişê xozaya Kurdistanî yo û wina va: "No şewat hema hema her serre yeno cuyayîş. Nê şewatê Licê, Pasûr, Farqîn û Dersim de yenê meydan tesaduf nîyê. Netîceyê operasyonê leşkerî de nê şewatî vejîyenê. Vera xozaya Kurdistanî kînê înan esto."

	 

	'Hewl danê kultur û xozaya ma çin bikerê'

	 

	Mehtabe arde ziwan ke şewatê ke vejênê dar, nebat û heywanî zirarêke pîl vînenê û wina va: "No veşnayîş heqê heywanan zî dest ra gêno. Hukmat vera ganeyê Kurdistanî zî tehemul nêkeno. Bi sebeban şewatan zêde kenê. Şerê çekdarî û siyasî qîm nêkeno na rey zî şarê Kurdî bi xozaya înan terbîye kenê. Wazenê kultur û xozaya ma çinbikerê. Serrê 90an de dewî veşnayî û nika zî wazenê bi veşnayîşê xoza ma bikerê xovîrrakerdiş."

	 

	'Ma do xozaya xo bipawê'

	 

	Mehtabe tewr peyîn qiseykerdişê xo de da zanayîş ke bi veşnayîşê daristanan dir sucê merdimayîyê pîl yenê kerdiş û va: “Vanê seba asayîşî operasyonan kenê. Cayê dinya de seba asayîşî warê daristanî ameyê veşnayîş? No qirkerdiş o, no şerêke polîtîk o. Tena daristan nê, tarîx, cinî, doman û cu hedef yenê girewtiş. Sere de Dêrsim de ma do her ca de wayîr herre xo vejîyê û vernîya şewatan bigîrê.”