Arzu Cerkezoglu: Ma no krîz awan nêkerd û ma bedel zî nêdê 

2018-08-16 11:14:19


	 

	STENBOL - Sereka Pêroyî ya DÎSKî Arzu Çerkezoglu da zanayîş ke bedelê polîtîkayê neolîberal karker danê û va: “Enflasyono tewr pîl yê 10 serrî peyîn yenê cuyayîş. Ma krîz awan nêkerd. No deynê karkeran nîyo, çepê ey sinifê karkeran yê Tirkîya gerek heqê xo bigîrê."

	 

	Sereka Pêroyî ya DÎSKî Arzu Çerkezoglu krîzê ekonomî şîrove kerde û dîyar kerde ke Tirkîya bi xetereyê krîzêke ekonomî yê pîl dir rî bi rî ya û va çîyê ewro yenê cuyayîş seba polîtîkayê kesê bi serran Tirkîya rayîra benê ameyî meydan.

	 

	'Berpirsîyarê krîzî bi serran o no welatî îdare kenê yê'

	 

	Arzu dewam de arde ziwan ke netîceyê polîtîkayê ekonomî de Tirkîya kewta mîyanê deyn û va: "Tirkîya sere de ê DYAyî bîyo warê talankerdişî yê kapîtalê fînansî yê mîyanneteweyî. Netîceyê polîtîkayê talankerdişê heme çimeyê Tirkîya de ewro krîz yenê cuyayîş. Berpirsîyarê nê krîzê yê ke bi serran o no welatî îdare kenê yê. Wext bi wext polîtîkayê ÎMF û bernameyê hukmatî vejîyayî vernîya ma û bedelê nê zî karker û kedkar bi hawayêke giran bi serran o danê."

	 

	'Derheqê krîzî de pêşnîyarîyê çareserî çin o'

	 

	Arzu da zanayîş ke yê tewr zêde krîz ra bi tesîr benê cinî û kedkar ê û wina va: "Bi serran o karkerî netîceyê giran yê modelê neolîberal cuyenê. 3ê Tebaxe de serekkomar planê çalakîya 100 rojan eşkera kerd. No planî de derheqê problemê kedkaran û karkeran de tu çîyêke çin o. Pêşnîyarê wezaretê ekonomî de zî çîyêk çin o. Yanî pêşnîyarê ke krîz meydan ra wedarnê çin o."

	 

	'Ma krîz awan nêkerd'

	 

	Arzu da zanayîş ke no krîz eynî wextî de wedartişê huqûq, demokrasî û aştî de zî bi tesîr o û arde ziwan ke karker, kedkar û sey DÎSKî do bedelê nê krîzî ê nêdê û va: “Nika ra kesî kar ra yenê vetiş. No proses her ke şino giran beno. Nimûne Dîlok de bi hawayêke cidî kes kar ra yenê vetiş. Ma wina vanê 'Ma krîz awan nêkerdo'. No krîzê deynî yo. Tirkîya bîya welatêke deyndar. La no deynê karkeran nîyo. No semed ra ma do bedelê nê krîzî nêdê.”