'Ma esteyê merdimanê xo wazenî’ 2018-08-15 13:56:11   Orîvan Ebdo/Nûpelda Têkoşîn   ŞENGAL - Prosesê Qetlîyamê Şengalî de dewa Koço yê Şengalî de qetlîyamêk komî pê amebî û bi seyan kesî hetê çeteyê DAIŞî ra amebî qetilkerdiş. Merdimê kesê ke qetlîyam de cuya xo vînî kerdî, reaksîyon nîşan dayî û dîyar kerdî ke ê esteyê merdimanê xo wazenî.   3ê Tebaxa 2014î de çeteyanê DAIŞî hêrişê Şengalî kerdbî û netîceyê hêrişî de bi hezaran kesî ameybî qetil kerdene, birîndar bîybî û bazaran de ameybî rotene. Wexto ke çeteyê DAIŞî kewtî mîyanê Şengalî hêzê PDKyî remayî û şar seba ke nêkewo destê çeteyan xo pawit Koyê Şengalî. La 14ê Tebaxe de durbunê Dewa Koşo vera dewijî nêeşkayî biremî.    Babete ser o merdimê kesê ke qetlîyam de cuya xo vînî kerdî û şahidê qetlîyamî ra Nuray Îdo Xelef û Hêva Murade qisey kerdî. Nuray û Hêva reaksîyon nîşan dayî qetlîyamî û dîyar kerdî ke ê esteyê merdimanê xo wazenî.   'Ma wazenê serê herre xo de bicuyê'   Cinîyan ra Nuraye va ke eke çîyêk ma rê nêkenê wa dest zî ma ra vera bidê ke ma serrê herre xo bieşkê bicuyê: "Beno ke dîn û bawerîya ma înan rê cîya bo, la ma nêşîyê serê kursîya tu kesî, her kes debara xo ramitişî û weylerdişê heywanan keno. Wexto ke eştî serê dewe gerek PDKî ma destê ê wahşetan de nêverdayne. Qaşo seba pawitişî tîya bî labelê ma mîyanê gonî, talan û qirkerdiş de verdayî."   'Ereban ma xapînayî'   Hêva Murad ke va keye û merdimanê xo qirkerdiş de vindî kerda wina va: "Wextê fermanî de dostê ma yê Ereb vatî ke çîyêk nîyo. La ma xapênayî. Xapênayîşê ereban ra dima çeteyan Dewa Koço de qetlîam viraştî û keyeyê pîyê mi ra nêzdîyê 70, 80 kesî ameyî qetilkerdiş."   Hêva Murade qiseykerdişê xo de qala qetlîyamî kerde û wina va: “Dewa ma ra tena çend birîndar û pêro pîya 15 kesî xelisîya yî. Hemwelatîyê dewa Koço merdimê yewbînan bî. Kesê ke wazenê piştî bidî ma, wa esteyê merdimanê ma bidî ma. 4 serrî yo tu game nêameyo eştiş. esteyê merdimê ma çal û çolan de mendî. Vîşêrê şervananê YPG, YPJ û gerîlayê HPG û YJA-STARî tu kesêk piştî nêda ma.”