Her kapaxêke cuyake yo bi kapax astengîyan derbaz bike 2018-08-11 10:28:26   Zeynep Durgut    COLEMÊRG - Qezaya Colemêrgî de Zîlan Baykan bi komkerdişê kapaxê bîdonan piştdayîş dano hemwelatîyê astengdaran. Zîlane heta nika 18 hezar kapax kom kerdê û amanc kena hûmara veja 50 hezarî.    Tirkîya de kampanyaya 'Kapaxê kewe' dewam kena. Kampanyaya ke bi sloganê ' Bi kapaxêke astengîyan derbaz bike' dest pêkerd hetê hemwelatîyê hîsgêran ra dewam kena. Qezaya Geverê Colemêrgî Zîlan Baykane bi komkerdişê kapaxê şûşeyan wazena astengdaran rê biba hetkar. Zîlane heta nika 18 hezarî kapax kom kerdê û amanc kena ke hûmara kapaxan vejena 50 hezarî. Zîlane dîyar kerde ke herkes eşkeno bi kapaxêke cuyayîş bivûrno.   Hedefê mi 50 hezarî kapaxê kesk ê'   Zîlane dewamê qiseykerdişê xo de arde ziwan ke herkes derûdora berpirsyar o û va ke tena kapaxêke bi hezaran hêvîyan awan keno û wina va: "Ez bi xêrê embazêke xo kampanya ra zanayîşê mi virazya. Her roj ma çend şûşe awe şimnenê û ma kapaxê înan erzenê û derûdor wina zaf tesîr beno. Bi hezaran astengdarê ke nêeşkenê bimeşê estê. La ma mîyanê roje de qet nêvînenê û ma seba înan çîyêk nêkenê. Eke merdim bi hêsgirî têbigeyro, bi rastî zaf çî estê ke merdim bikero. Ganî dewlete hemwelatîyê astengdar yê ke nêeşkenê bimeşê rê sandalye bigîra. Labelê welatê ma de çîyêk wina çin o. Seba ke çin o na kampanya ameya destpêkerdiş. Her serre 50 ton bererdaşê plastîkan yenê viraştiş û xeylê înan ra zî sey lêşin vejîyenê. Hedefê mi o yo ke ez hûmara kapaxan bikerê 50  hezar. Seba ke 50 hezar kapaxan rê kursîyêke danê."   'Bi kapaxêke astengîyan derbaz bike'   Zîlane arde ziwan ke vera astengdaran merdimî bi hêsgir tênêgeyrenê û wina va: "Tirkîya de hende astengarê ke nêeşkenê bimeşê estê, labelê kursîya înan bi teker çin a. No problemêke pîl o. Gama ke ma awe şimnenê ma eşkenê kapaxê înan kom bikerê seba ke ê sey cuyake newe ro ma ageyrê. Ez fek komkerdişê kapaxan vera nêdana. Komkerdişê her kapaxêke zaf girîng o. Ma eşkenê pîya kom bikerê. Bi kapaxêke astengiyan derbaz bike."