'Heta ke kiştoxê lajê mi nêrê hukmkerdiş, ez nêmirena' 

2018-08-09 12:05:10


	 

	Zeynep Durgut

	 

	WAN - Serê qetilkerdişê Ahmet Demiragaço ke îdareyê DBPyî Artemêtî bi 2 serrî derbaz bi, la hema kiştoxî nêameyê vînayîş. Maya Ahmet Demîragaçî dîyar kerde ke seba kiştoxê lajê aye hesab bidê, aye do heta peynîya emrê xo têkoşîn bikera.

	 

	Serra 2016 de 13 hezîrane de qezaya Artemetî de wesayîto ke îdareyê Partîya Mintiqaya Demokratîke (DBP) Ahmet Demîragaç (21) tede bi hetê polîsan ra amebi gulevarankerdiş û netîceyê gulevaranî de Ahmet û 2 kesê bîn zî cuya xo vinî kerdibî. Keyeyê Ahmet Demîragaçî derheqê hedîse de seba ke kiştoxî bêrê hukmkerdiş muracatê sucî kerdibî. Keyeyî waştib ke prosesê huqûqî bêro destpêkerdiş. Labelê no waştişê keyeyî hetê dozgerî ra ame redkerdiş. Serê hedîse ra 2 serrî derbaz bîya la hema zî kiştoxê Ahmetî nêameyê vînayîş. Maya Ahmetî, Emîne Demîraagaçe qisey kerde. Emîne dîyar kerde ke lajê aye Ahmet verê çimê aye de bi îşkence berdê û va kiştoxê Ahmetî bêrê vînayîş û hesab bidê û do heta peynîya cuya xo têkoşîn bikera.

	 

	'Verê çimanê mi de lajê mi îşkence kerdî û berdî'

	 

	Emîne dewamê qiseykerdişê xo de arde ziwan ke roja ke Ahmet ameyo kiştiş, polîsan eşto serê keyeyê înan û a roje wina qalî kerde: "Lajê mi verê çimanê mi de îşkence kerdî. Bi sîleh dayî piro. Wina îşkence ro ci kerdî didanê ey heme şikyayî. Bi pirodayîşê înan dir gonî fekê ey ra ameyne. Mi waştêne ez Ehmedê xo destê înan ra xilas bikerî, la dayî mi ro zî. Ehmedî înan ra va 'Medê maya mi ro' La înan goşdarî nêkerd." 

	 

	Emîne da zanayîş ke verê çimanê aye de lajê aye îşkence kerdî û wina va: "Hem lajê mi îşkence kerdêne û eynî wextî de zî keyeyê ma de cigêrayîş kerdêne. Seba ke lajê mi sûcdar bikerê polîsên ke eşt serê keyeyî sîleh ardî keye û keye de vila kerdî. Berê ma şiknayî û çîyêk keye de nêverdayî. Dima ra lajê mi berdî. Eynî roje de pîyê Ehmed zî ame tepiştiş. Dimayê ke lajê mi berdî mi êdî ey ra zanayîş nêgirewt. Wexto ke mi xeberê şan de tamaşe kerdî, mi nas kerd ke wesayitê lajê mi ke tede yo ameyo gulevarankerdiş û lajê mi qetil kerdê. Ehmed wendekar bi. Ehmed seba ke debara keyeyî bikero kuçeyan de şew û roje xebityayne. Bi zanayîş lajê mi qetil kerdî. Tu guneyê lajê mi çin bi. Mi domanê xo bi zaf zor û zahmetî pîl kerdî. Ehmedê mi zaf qij bi, merg ey ra tewr pîl bî.

	 

	'Heta ke kiştoxî nêrê hukmkerdiş merdiş ma rê heram o'

	 

	Emîne arde ziwan ke nêverdayê lajê aye, aye ra xatir biwazo û wina va: "Mi gonîya lajê xo nêdî. Gama ke mi cenazeyê lajê xo dî, lajê mi sey nêamebi qetilkerdiş û rakewte bi. Lajê mi ame qetilkerdiş, la hema kiştoxê lajê mi hesab nêdayê. Gerek kiştoxê lajê mi bêrê cezakerdiş. La pîyê ey ame tepiştiş û destûr nêdayê ke pîyê ey bêro serê cenazeyê lajê xo zî. Ça de bêedeletîyêke wina ameyo vînayîş? Kesê ke lajê mi qetil kerdî îfadeyê xo de vanê 'Ma nêzanayne ke Ahmet wendekar o' Bi nê îfadeyan xo xelisnayî. Kam ci bext û kam zerrî qîm kena ke merdim ciwanêke bikşo? Homa no dejî nêmojno tu maye. Heta ke kiştoxê lajê mi verê çimanê mi de nêrê hukmkerdiş mergi mi rê heram bo. Roja ke zulm xo ra şerm bikero zî do bêro."