Komkerdişê fistiqan dest pêkerd 

2018-08-07 12:51:02


	 

	RIHA - Rihaya ke yew cayê girîng yê berardişê fistikan a, germbîyayîş vejîya 45 dereceyî û dest bi komkerdişê fistiqan ame kerdiş. Cinîyê ke fistiqê bi nameyê boz û beng kom kenê, hem germbîyayîş û hem zî heqdestê ke gênê bi gazinc ê.

	 

	Rihaya ke binê germbîyayîşê 45 dereceyî de dest bi komkerdişê fistiqan ame kerdiş. Fistiqê ke çimeyê debara ya tewr girîng ya Rihaya, karkerî seba komkerdişî serê siba rew wirzenê û şinê serê erdî. Karkerî binê germbîyayîşê zêde de bê asayîş û bi pereyêke kêm xebityenê. Cinî bi camêrdan dir eynî karî kenê la goreyê camêrdan tewr kêm heqdestê xo gênê. 

	 

	Afîfe Canpolate sey xeylê cinîyê Riha her wext serê erdan de têkoşînê kede daya. Afîfe dîyar kena ke tewr zêde germbîyayîş tesîr serê înan keno û wina va: "Ez her wext serê erdan de xebityaya. Aşmê Temmuze û Tebaxe de ma dest bi komkerdiş kenê. Ma tewirê Boz Temmuze de kom û beng zî Tebaxe de yenê komkerdiş. Binê nê germî de bi rastî xeylê zehmet o.”

	 

	Afîfeye dewam de da zanayîş ke senîn newe yenê ser erd ewil karbeşî kenê û wina va: "Ma nêzdîyê 20 karkerî serê siba rew yenê serê erd. Ma senîn yenê ma karbeşî kenê. Wezîfeyê mi zî amadekerdişê werdê serê siba û nîmerojî yo. Karkerî saet 07.30-80.00 arayî kenê û dima dest bi kar kenê. Reyna ma nanê nîmerojî wenê û çay şimnenê."

	 

	'Ma camêrdan ra tewr kêm pere gênê'

	 

	Afîfeye qalê zor û zehmetîyê kar zî kerde û wina va: "Şitlê fistikan 10 serre dima berardiş danê. Gerek no prosesî de aşî nêrêkerdiş. Ma demêke derg eynî dare ra fistiqan kom kenê. Reyan xişike dana piro û serrêke ma ci ra çîyêk nêgînê. Reyna seba serdî zî reyan ma berardiş nêgînê. Emsar berardişê ma de problem nêame cuyayîş."

	 

	Di cinîyê ke zî nêwaştî qisey bikerê la dîyar kerdî ke ê goreyê camêrdan heqdestêke kêm gênê, karê ke camêrdan dir kenê eynî yo la bêtêduştîyêke wina yeno kerdiş.