Ciwanê HDPyî 11 Tebaxe Amed de yenê têhet  

2018-08-07 12:21:12


	 

	AMED - Meclîsê Ciwanan yê HDPyî seba ‘Şahîya Ciwanan’ yê Amedî de viraznê veng dayî û vatî: “Bi zanebîyayîş vernîya ciwanan yena girewtiş. Seba ke dînamîkê tewr xurt yê komelî ciwan ê.”

	 

	Meclîsê Ciwanan yê HDPî 11ê Tebaxe de Warê Îstasyonê Amedî de ‘Şahîya Ciwanan’ viraznenê. Ciwanan seba beşdarbîyayîşî veng dayî û dîyar kerdî ke hewl yeno dayîş ke vernîya ciwanan bêra girewtiş û ê do qetî destûr nêdê nê çî.

	 

	Endama meclîsî Remzîye Sizici da zanayîş ke bi taybet wextê peyîn de hêriş zêde bîyê û va ganî cinî bi hawayêke xurt beşdar bibê û wina va: "Çarçeweya OHALî de vera ciwan, cinî û cinîyê ciwan hêrîş zêde bî. Her ca ra hewl danê vernîya ma bigîrê. Ma do warê îstasyonî pirr bikerê û cewabêke pîl bidê kesê ke vernîya ma gênê. Ma veng danê heme şarê xo bibê roşnê hêvîye. Bi taybet ma cinîyê ciwan ganî war pirr bikerê. Ma do sloganê xo yê ‘Ma bi ciwanî dest pêkerd, ma do bi ciwanî serkewte bibê' pîya biqîrê."

	 

	'Wazenê vernîya ciwanan bigîrê'

	 

	Nerîman Akyuze veng da şarê Amedî ke bêrê Warê Îstasyon û ardî ziwan ke dewlete bi zanebîyayîş verê xo danê cinî û ciwanan û wina va: "Ma do polîtîkayê vera cinî û ciwanan veng vejê. Wazenê unîversîte, lîse û warê vernîya ciwanan bigîrê. Bi zanebîyayîş vernîya înan gênê. Dînamîko tewr xurt yê komelî ciwan ê. Seba ma nê reyke bîn zî bimojnê ra ma do 11ê Tebaxe de Warê Îstasyonî de bê."