'Rewşa kêna mi ver bi xeterî de şino' 

2018-08-07 11:21:12


	 

	Zeynep Turgut

	 

	COLEMÊRG - Hepisxaneyê Tirkîya de bi hezaran hepsîyê nêweş bi teda û îşkenceyê giran dir rî bi rî manenê. Hepisxaneyê Kayserî de hepsîya nêweş a bi nameyê Seyran Demîre yew nê hepsîyan ra ya. Seyrane 4 serre yo mîyanê şert û mercê hepisxaneyî de pêwa nêweşîya xo têkoşîn kena. Maya Seyrane veng da herkesî ke vera hepisxaneyan hîsgêrî têbigeyrê û va bibê vengê hepisxaneyan.

	 

	Hepisxaneyê Tirkîya de teda, hêriş û şîdetê îdareyê hepisxaneyan dewam kenê. Hepisxaneyan de bi hezaran hepsîyê nêweş estê. Hepisxaneyê Kayserî de hepsîya nêweş e bi nameyê Seyran Demîre yew nê hepsîyan ra ya. Seyrane bi nêweşîya rîşa merdimwere kewta û xo ver dana. Seyrane dimayê Hepisxaneyê Tarsusî surgunê Kayserî amî kerdiş. Seyrane 4 serre yo tedavîkerdiş ra zêde, bi polîtikayê surgunkerdişî dir rî bi rî manena û bi keyfî yena surgunkerdiş.

	 

	'Îdareyê hepisxaneyî kêna mi terkê merdişî kerda'

	 

	Maya Seyrane Ciweyra Demîre arde ziwan ke rewşa Seyrane ver bi xetereyî de şina û va ke Seyrane nêeşkena mîyanê şertê hepisxaneyî de bicuya û wina va: "Tu sucê kêna mi çin bi. Bi 4 serre yo bi nêweşîya xo dir mîyanê şert û mercê hepisxane de têkoşîn kena. Seyrane zaf nêweş a. Mîyanê çar dêsan de merdimêke nêweş nêeşkeno cuya xo tewr zêde dewam bikero. Benê nêweşxane û vanê tu nêweşîya aye çin a. Dejê aye dejêke giran o. Nêeşkena çîyêk biwero. Xora hepisxaneyan de îşkence esto. Werdê tewr nêbaş danê. Seba ke werdê nermî çin yê, biskuvîyan danê Seyrane. Seba ke bêra tedavîkerdiş ma zaf waştişname da. Labelê bi tu hawa nêameyê qebûlkerdiş. Destûr nêdanê ma şêrê pêvînayîşan. No metodêke îşkence yo. Homa no zulmî qebûl nêkero. Îdareyê hepisxaneyî kêna mi terkî mergî kerdê."

	 

	'Rewşa kêna mi ver bi xeterî şino veng bidê hepusxaneyan'

	 

	Ciweyraye dewam de va ke ganî Seyrane bêra tedawîkerdiş û wina va: "Hepisxaneyan de zulm kenê. Ça ameyo vînayîş ke merdimê nêweş nînê tedawîkerdiş û binê çar dêsan de ameyê girewtiş? Benê revîr doktor vano tu nêweşîye aye çin a. Raporê aye nêweşîya helnayîşê estan esta la reyna zî ne yena veradayîş ne zî yena tedawîkerdiş. Nika hepisxaneyan de bi hezaran hepsîyê nêweş estê. Çira vera nêdanê? Do çi zirarê nêweşan biresê merdiman? Kêna mi seba nêweşîya xo nêeşkena serê lingan vindera. Kêna mi tedawîkerdiş ra tewr zêde surgûn kerdî. Ez 3 aşmî ra reyke şênê pêvînayîşan. Rewşa aye ver bi xeterî şina. Wa herkes bi hîsgêrî têbigeyrê, veng bidê hepisxaneyan. Gerek hepsîyê nêweş bêrê veradayîş. Ganî no zulm peynî bibo. Ez wazena ke kêna mi bi lez bêrê veradayîş. Heqê merdiman bi îşkence yeno îhlalkerdiş."