Fatma Ocalan: Ma cuya birayê xo rê endîşeyîn ê 

2018-08-06 10:43:51


	 

	RIHA - Fatma Ocalane dîyar kerde ke seba bi birayê xo dir pêvînayîş bikerê, her rey muracat kenê la rastê tewirê zehmetîyan yenê û wina va: "Rewşa weşîye ey senîn o ma nêzanê. Ma cuya ey ra endîşeyîn ê. Ma wazenê tecrîd bi peynî bibo."

	 

	Seba tecrîdê Hepisxaneyê Tîpê F yê Îmralî yeno kerdiş 27ê Temmuza 2011an heta nika Rayberê PKKî Abdullah Ocalan bi avûkatanê xo dir nêeşkeno pêvînayîş bikero û tewr peyîn 11ê Êlule 2016an de bi birayê xo Mehmet Ocalan dir pêvînayîş kerd. Avûkatan seba pêvînayîşê 777 rey muracatê Serdozgerîya Komara ya Bursa kerdî û bi sebebê ‘muxalefetê hewa’, ‘koster xirabeya’, ‘OHAL’ ra yenê redkerdiş.

	 

	Birayê Abdullah Ocalan, Mehmet û waya ey Fatma Ocalan seba şêrê Îmralî bi hemkarîyê avûkatanê xo 87 rey muracatê Serdozgerîya Komara ya Bursa kerdî û reyna bi eynî sebeban ameyî redkerdiş.

	 

	'Heme muracatî ameyî redkerdiş'

	 

	Waya Abdullah Ocalan, Fatma Ocalan da zanayîş ke bi 4 serre yo bi birayê xo dir nêeşkena pêvînayîş bikera û wina va: "Ma nêzanê rewşa weşîya ey senîn a. Ma cuya ey ra endîşeyîn ê. Seba ke nê endîşeyî bêrê wedartiş ganî berê Îmralî abibo. Heme muracatê ma yenê redkerdiş.”

	 

	'Ma weşîya ey ra endîşeyîn ê'

	 

	Warezaya Abdullah Ocalanî, Elîf Ocalane zî da zanayîş ke ganî pêvînayîş newe ra bêrê destpêkerdiş û wina va: "Ma wazenê bi serekî dir reyna pêvînayîş bidê destpêkerdiş. Ma sey keyeyî weşîya serekî ra endîşeyîn ê. Seba tecrîd wirzo, ez veng dana heme merdiman ke bêrê têhet û no het ra ganî çalakî virazîyê."