'Bi surgunan wazenê domananê ma bidê xovîrrakerdiş' 

2018-08-03 11:11:34


	 

	WAN - Hepisxaneyê Tirkîya de hêriş, teda û îhlalkerdişê heqê merdiman her roje zêde benê. Pêvînayîşan ra heta ke şîyayîşê hepisxaneyan keyeyî bi îşkenceyêke pîl dir rî bi rî manenê. Maya Meryema ke 3 hepsîyê aye estê, seba ke îmkanê aye çin ê serre ra reyke şina pêvînayîşê laj û tornê xo. Meryeme dîyar kerde ke hukmat bi nê tedayan wazeno domanan bido xovîrrakerdiş.

	 

	Hepisxaneyê Tirkîya de teda, hêriş,  polîtikayê surgunkerdişî û îhlalkerdişê heqan dewam keno. Vera heme astengîyê îdareyê hepisxaneyan keyeyî bi îmkanê tewr kêm şinê pêvînayîşê domananê xo. Maya Meryem Demîragac(80) zî nê keyeyan ra ya. Pêwa laj û 2 tornê aye zî bajarê cîya û welatê cîya hepisxane de yenê tepiştiş. Meryeme arde ziwan ke aye serre ra reyke şina pêvînayîşê laj û tornanê xo û va ke keyeyan bi nê tedayan bêçare verdenê.

	 

	'Ez emrê Homayê xo rê ra zî ya, la ez hukmê dozger û dadgeran razî nîya'

	 

	Meryeme dewamê qiseykerdişê xo de arde ziwan ke bi serran o zulmê dewlete peynî nêbîyo û va seba her hepsîyêke aye cayêk de yo şîyîş û ameyîş de zehmet ancena û wina va: "Pêwa lajê mi 2 tornê mi bîn zî hepisxane de yê. Tu sucê înan çin o. Lajê mi rê mûebbet birnayî. Seba ke ez hem nêweş a, hem zî îmkanê mi çin ê ez serre ra reyke şina pêvînayîşan. Bi serrêke ser ra derbaz bi, hema ez nêşîya pêvînayîşê lajê xo. Hukmat bi surgunan wazeno ke domanê ma bi ma bidê xovîrrakerdiş. No zulm bi zanebîyayîş serê keyeyan yeno kerdiş. Xora bi zaneyîş hepsîyan surgunê cayê ke keyeyan ra dûr kenê. Keyeyan wina yewbînan ra visnenê. Eke îmkanê mi bibayne, ez aşmêk ra reyke bişîne serdayîşê doman û tornê xo. Ez emrê Homayê xo ra razî ya, la ez hukmê dozger û dadgeran razî nîya. Proseso xirab tewr zêde serê hepsîyan de tesîr keno. Binê şert û mercê tewr pîl de cuyenê. 36 serrî ceza dayî lajê mi û bi 21 yew serre yo hepisxane de yo. Ez bi hesretê laj û tornanê xo cuyena."

	 

	'Merdimayî mîyanê çar dêsan de fetisnenê'

	 

	Meryeme da zanayîş aye wazena ke êdî çareserîyêke bêro vînayîş û wina va: "Tornêke mi Rojhelat de hepisxane de yo. Xora zulmê rejîmî verê çiman de yo. Ma nêeşkenê mektub bieşrawê, ne zî bi telefon ci dir qisey bikerê, ne zî ma eşkenê şêrê pêvînayîşan. Xora hişmendîyê Tirkîya û Îranî eynî çîyo. Eke pawitişê aşitî suc bo, ez do qetî fek waştişê aştî ra fek vera nêdî. Tirkîya de sîyaset suc o. Tu cayê dinya de nimûneyê ci nêameyo vînayîş. Nika hepisxaneyê Tirkîya bi hepsîyê sîyasî pirr bîyê û her roj zanayîşê hepisxaneyê ke do newe birê awankerdiş danê. Merdimayî mabêne çar dêsan de fetisnenê. Her heqê înan yeno îhlalkerdiş. Rojname wendiş heta werdê înan her çîyêke înan rê sînor dayî ro. Ez ameya nê emrê xo heta nika, mi hêvî û bawerîya xo vera aşitî vindî nêkerda û ez do qetî vindî nêkerî."