Ma do vera fermanan sere nêtewênê û ma do xo ver bidê' 

2018-08-01 11:46:04


	 

	Lîlav Elî

	 

	ŞEHBA - Hemsereka Yewîya Êzidiyê Mintiqaya Efrînî Soad Hiso serrgera 4in Qirkerdişê Şengalî arde vîr û dîyar kerde ke fermanê 74an ke serê Êzidiyan de ame kerdiş, hêrîlişê ser Êzidiyê Efrînî cîya nîyo û va ke ê do vera fermanan qetî sere nêtewênê û xo ver bidê.

	 

	3ê Tebaxa 2018 de Çeteyê DAÎŞî bi hawayêke wehşî hêrişê Şengalî kerdî û qirkerdiş kerdî. Bi hezaran kesî ameyî qetilkerdiş û bi taybet zî cinî hedef girewtî. Bi hezaran cinî remnayî tecawiz, îşkence kerdî û înan bazaran de sey koleyan rotî. Hemsereka Yewîya Êzidiyê Mintiqaya Efrînî Soad Hiso babete ser dîyar kerde ke înan hêzê xo vindî nêkerdo û serê lingan de yê û wina va: "Tarîx ra heta nika her wext Êzidî bi fermanan dir rî bi rî mendê. Êzidî bi xêrê fikrê Rayber Apo bi hêztir bîyê, serê lingan de mendê û xoverdayîşê xo dewam kerdê."

	 

	'Ma do heta peyîn xo ver bidê'

	 

	Soad Hiso dîyar kerde ke ê bîyê şahidê dejê fermanê 74an û va: "Wexto ke çeteyê DAÎŞî hêrişê Şengalî kerdî destpêk de cinî hedef girewtî. Nika 3 hezar cinî hema destê çeteyan de yê. Ganî heme dinya biba yew û vera zulmo ke cinîyanê Êzidîyan rê ame kerdiş vinderê. YPG/YPJ resayî hewarê Êzidîyan û bi hezaran Êzidî qirkerdiş ra xelisnayî. Xêrê şervanan, Êzidîyan xo bi rêxistin kerd, sazgehê xo awan kerdî û nika serê linganê xo de vindenê. Ma do heta peyîn xo ver bidê."

	 

	'Ma do têkoşînê xo yê vera dagirkerdişî dewam bikerê'

	 

	Soade da zanayîş ke ê do sereyê xo vera dagirkeran nêtewênê û qiseykerdişê xo wina qedêna: "Çeteyê DAÎŞî wexto ke hêrişê Şengalî kerdî waştî Êzidîyan çin bikerê. La Êzidî qetî nînê çinkerdiş. Çunke ê serê felsefeyê Rayber Apo xo bi rêxistin kenê. Fermanê 74an ke serê Êzidîyan virazya hêrişê serê Êzidiyê Efrînî cîya nîyo. Seba şexsê Êzidiyan de Kurdan çinbikerê hêriş kerdî. Tarîx ra heta nika her wext Êzidî bi hêrîşan dir rî bi rî ameyê verdayîş. Xeylê Êzidî bi zor bîyê musliman. La pêwa heme zordestîyan Êzidî vera no zulmî vindertê. Ma do têkoşînê xo yê vera dagirkeran dewam bikerê."