Arîna 4 serrî: Ma tîya ra vejê    

2018-07-30 11:09:01


	 

	MÊRDÎN - Vesîle Yuksela ke ser perso ‘PKK rêxistinê terorî ro yo?’ cewabê ‘nê’ da amî tepiştiş û bi kêna xo Arîn û Avesta dir amî tepiştiş. Arîna 4 serrî ya bi pîyê xo dir telefon de qisey kerda ‘ma tîya ra vejê, ma wazenê vejîyê teber.'

	 

	Serra vîyarte aşma Sibate de Mêrdîn de cinîya bi nameyê Vesîle Yuksele seba parekerdişê çapemenîya komelî bi sebebê propagandaya rêxistinî kerda amî tepiştiş û dadgehe de rastê perso ‘PKK rêxistinê terorî yo?’ amî û cewabê ‘nê’ da. Yuksele serê no vatişî amî tepiştiş û bi kênayanê xo Arîn Mîrkan (4) û Avesta (6) dir eşrawitî hepisxane. Vernê de eşrawitî Hepisxaneyê Tîpê E yê Mêrdînî û dima ra zî eşrawitî Hepisxaneyê Tîpê M yê Bayburtî. Cezaya Vesîleye heta aşma çele yê 2019 peynî bibo. Arîna ke maya xo dir kewte hepisxane 8 aşmî hepisxane de mende û hepisxane de kewte di serrîya xo û nika 4 serre ya. Ame zanayîş ke Arîne seba şert û mercan nêweş a û Avesta zî seba ke hepisxane de ya nêeşkena dest bi mektebe bikera.

	 

	Arîn: Ma tîya ra vejê

	 

	Pîyê domanan Sultan Yukselî dîyar kerd ke seba her tewir tedayê hepisxaneyî domanê ey kîlo dayê û va: "Her telefon de bermenê. Vanê ‘bes o ma tîya ra vejê.' Bi taybet Arîne vana mi tîya ra vejê. Ez zî zaf xemgîn bena. Vejîyê zî hewteyêke eşkenê verê mi de bimanê. Wexto ke vengê bermişê înan yeno mi ez zaf xemgîn bena. Avesta gerek emsar dest bi mektebe bikera. La hepisxane de ya."

	 

	Hepsîyan ra vengdayîşê hîsgêrî

	 

	Heto bîn ra hepsîyê hepisxaneyî zî vera tedayê serê înan vengdayîşê hîsgêrî raya pêroyî kerdî.

	 

	Waştişê veradayîşê bi kontrol ame redkerdiş

	 

	Avûkatan seba Vesîle veradayîşê bi kontrol muracat kerdî. Goreyê qerarnameyî cinîyê ke domanê înan mabêne 0-6 de bibê eşkenê ‘veradayîşê bi kontrol’ fêde bigîrê. La na rewşe seba Vesîle derbaz nêbena. Dadgerîya Înfazê Cezaya bi sebebê ‘hepsîya sîyasî ya’ red kerd.