Doza Zeynep Yilmaze averşîyayîş çin a 

2018-07-26 14:57:31


	 

	ŞIRNEX - Zeynep Yilmaze Cizîrî de keyeyê xo vera de ameye qetilkerdiş. Derheqê qetilkerdişê aye de doze ameye akerdiş û dozgero ke ‘faîlan nêvîna’,  ‘qerarê cigêrayîşê daîmî’ da û dosya vîyartişê demê reyde rî bî rî yo. La mêrdeyê aye Omer Yilmazî derheqê kesê şikinan de xeberan dano û zaf balkêşo ke îfadeya şahidan nîno girewtiş.

	 

	Zeynep Yilmaze (45) qezaya Cizîrî ya Şirnexî de wextê qedexeyê tebervejîyayî yê 14ê Kanûna 2015î de fekê berê xo yê taxa Cudî de ameye qetilkerdiş. Roja 7. yê qedexeyê tebervejîyayîşî de gule gina sîneyê Zeynebe ser û cuya xo vînî kerde. Dozgerîya Komarî ya Cizîrî derheqê mergê Zeynebe de tehqîqat daye dest pêkerdiş û ‘qerarê cigêrayîşê daîmî’ da û dosya vîyartişê demê reyde rî bî rî yo. dozgerî qerarê bi şertê serrêk de reyêk dosya bêro cigêrayîşî zî da. Dosyayo ke 25 serrî wextê demvîyartişê ci esto, eke kesê şikin nêrî vînayîş do 2014î de bikewo mîyanê dosyayanê demvîyarteyan.

	 

	Seke yena îdîakerdiş ‘endama rêxistine nîya’

	 

	Qerarê dozgerî de ame îdîakerdiş ke tewrê cigêrayîşan tespîtkerdişê kesê şikinan mumkun nîyo û heta demvîyartişê dosyayî kesê şikinan bigêrî û serrîyek de reyêk do raporê cigêrayîşî bierşawî serdozgerî rê. Doya de ame îdîakerdiş ke Zeynep Yilmaze seke yena îdîakerdiş ‘endama rêxistine nîya’ û tewirê guleyo ke ginayo sîneyê Zeynebe nêameyo tespîtkerdiş. Babete ser o Omer Yilmazî qisey kerd û derheqê gule kamî ca ra ameyo de malumatê muhîman da.

	 

	'Ma cenaze pişna batanî'

	 

	Omerî qiseykerdişê xo de wina va: “25 serrî yo ma zewicnaye yî. 9 domanê ma estî. Prosesê qedexeyê tebervejîyayîşî de hertim gule û topan eştêne taxa ma. Heme cayan de nobedarî estbî. Ma nêeşkayêne bivejîyî teber. Aw û ceyran çin bî. Roja 7. yê qedexeyî de nobedarê mektebê taxa Cudî cinîya mi kerdî hedefê xo û bi guleyek qetil kerdî. Mi vîna ke Zeynepe kewte erd. Cîranê ma Zeynepe berdî heta keyeyê şînî yê Cudî ver. Zeynepe ewca de cuya xo vînî kerde. Cenaze rojêk wesayîte de mende. Dima ra ma xebere da şaredarî. Wesayîtê şaredarî hetê şandî de ame. La seba ke wesayît nêkewt taxe, ma cenaze pişna batanî. Destûr nêdayî ke ma cenaze reyde şêrî. Cenaze 10 rojan nêweşxaneyê dewlete yê Şirnexî de mende.”

	 

	'Goristanê bêkesan de defin kerdî'

	 

	Omerî tewr peynî wina va: “Dima ra ma cenazeyê lajê xo Mehmet Yilmazî nêweşxaneyê dewlete yê Cizîrî de dî. Ma ra vatî ‘eke şima cenaze nêberî ma do bibî goristanê bêkesan.’ Cenaze bê ma ame definkerdiş. Polîsî destxwr nêdayî ma cenaze reyde şêrî. Wexto ke Zeynepe ameye qetilkerdiş, veyveka ma Sidika Yilmaze ewca de bîye. Şahidê hedîseyî nêameyî goşdarîkerdiş û cayê hedîseyî de cigêrayîş nêameyî kerdiş.”