'Hêvî û xeyalê ma bi têkoşînê cinîyan yenê pawitişî' 

2018-07-26 10:16:46


	 

	Sorgul Şêxo

	 

	TIL TEMIR - Hêzê pawitişê cinî û komelî her ke şino zêde beno. Endamê Pawitişê HPC-JINî binê nameyê komîteyê pawitişê yê komînan de tax û dewê bajaranê xo pawenê.

	 

	Binê nameyê komîteyê pawitişê yê komînan de HPC-JIN amî awankerdiş. Wezîfedarê komîteyê pawitişî taxan û dewanê xo berpirsiyar ê. Til Temir de hêzê pawitişê cinîyan her ke şono xurt beno û cinî vera heme tewir hêrişanê xo, taxan û dewanê xo pawenê. Hêzê Pawitişê HPC-JINî yê dewa Um-Elkeyfî vatî: "Ma do heta peynî herra xo bipawê."

	 

	Endama HPC-JINî Fatimê Xalîd ke maya 4 domanan a dîyar kerde ke aye bi zerrî û gan dewa xo û bajarê xo pawena û va: "Eke merdim nêeşko welatê xo bipawo do nêeşko erjê xo zî bipawo. Seba cuyake asayîş yê seba domananê ma û şarê ma, ma  bi zerrî û gan xebityenê û ma do heta peynî dewa xo û bajarê xo dagirkeran ra bipawê."

	 

	'Cinî wayîrê hêz û îradeyêke xurt ê'

	 

	Cinîya bi nameyê Ayîşa Hisêne da zanayîş ke bi xêrê Hêzê Pawitişê Cinîyan xo bi asayîş hîs kenê û wina va: "Dinya de her ganeyêke bi hawayêke cîya xo pawenê. Merdimî zî mecburê ke xo vera hêrişan bipawê. Cinîya Kurd zî wayîrê hêz û îradeyêke xurt a û nika dewe û bajarê xo û tehûkeyan ra pawena."

	 

	'Hêvî û xeyalê ma bi têkoşînê cinîyan yeno pawitiş'

	 

	Cinîya bi nameyê Nofa Birahîm zî da zanayîş ke aye bi xêrê Hêzê Pawitişê Cinî bi rehetî rakonê, aram ê û va: "Seba têkoşîn û pawitişê Hêzê Pawitişê Cinîyan ma spasiyê germ pêşkeş kenê. Xêrê înan ra ma nêtersenê û ma do heta peyîn piştdayîş bidin Hêzê Pawitişê Cinî. Hêvî û xeyalê ma bi têkoşînê cinîyan yenê pawitiş."