Turkîyaya ke kewte çale do 3 aşmî nêeşka bimeşa 

2018-07-25 14:56:08


	 

	MÊRDÎN - Nisêbîn de Turkiye Îlerîya kewte çala ke fîrmayê ceyranî kendib, platîn kerdî lîngê aye şikya. Keyeyî derheqê fîrma de gerre kerd û çale zî rojêke dimayê hedîse amî padayîş.

	 

	Turkiye Îlerî ya 62 serrî ke Nisêbînê Mêrdînî de cuyena, hewteyê vîyarte de kewte çala ke şîrketê ceyranî kuçeyê Mêrdînî adabî. Kurîya çale metreyêke, hîrayîya ci 80 santîmetre û dergîye ci zî 100 metre bî. Turkiye ke bi tornê xo yê 4 serrî kewte çale, wedarnayî nêweşxane û platîn kerdî lingê aye. Turkiye 4 rojan nêweşxaneyî amî dermankerdiş. Turkiye derheqê fîrma de gerre kerde û va seba êdî kes zirar nêvîno ganî çale bêro padayîş.

	 

	Dimayê zirarî amî padayîş

	 

	Çala ke dorê aye de tu şîyarî û tedbîr çinbi, wexto ke Turkiye kewte, vernê de esnaf û şar mudaxaleyê hedîse kerdî. Turkiye ke lingê aye şikya û bedenê aye de derb virazya û tornê aye zî serê xo ra birîndar bî. Dimayê hedîse çale hema newe amî padayîş.

	 

	Do 3 aşmî nêeşka bimeşa

	 

	Turkiye seba platînê lingê xo yê hîrê aşman nêeşkena bimeşa.Turkiye wina va: "Ez bi tornê xo dir şîne market. Dima ra lingê mi şemitya û ez kewta çale. Tornê mi zî kewt. Dima ra hemwelatîyan ma vetî. Ambulanse amî ma berde nêweşxane. Ez emeliyat bîya. Platîn kerdî lingê mi. Pişta mi de birînî estê. Ez 4 rojan nêweşxane de menda. Vanê 3 aşmî dima ti do rehet bibê."