Dosyaya Pirsûsî de averşîyayîş nêvirazêno  

2018-07-25 12:39:15


	 

	RIHA - Avûkata Esvet, Adîl û Celal Şenyaşarî ê ke Pirsûs de ameyî qetilkerdiş, Sevda Çelîk Ozbîngole dîyar kerde ke pêwa îtîrazê înan qeraro nimteyê serê dosya dewam keno û va dosya de tu averşîyayîş nêvirazêno û cigêrayîş zaf erey meşnenê.

	 

	Pirsûsê Rihayî 14ê Hezîrane de avûkatê parlametnerê AKPî Îbrahîm Halîl Yidiz û merdimê qorîcîyan, esnaf Haci Esvet Şenyaşar û domanê ey Adîl û Celal Şenyaşarî kargerî û nêweşxane de lînç kerdî û dima ra qetil kerdî. Hedîse de birayê Îbrahîm Halîl, Mehmet Şah Yildizî zî cuya xo vinî kerd. Dimayê hedîse Fadil Şenyaşar bi talîmatê dozgerî ra ame vetiş û Edlîyeya Riha ra ame tepiştiş.

	 

	Hema keyeyê ey Îbrahîm Halîl û avûkatê ey kes nêameyo tepiştiş û keyeyê Esvet, Adîl û Celal Şenyaşarî zî rastê tehdîdan yenê û seba tehdîdan mecbur mendî koç bikerê. Avûkatî seba qeraro nimte serê dosyan wirzo îtîraz kerdî hetê Dadgerîya Cezaya Sulh ya 2yîn yê Riha ra ame redkerdiş.

	 

	Avûkata keyeyî Sevda Çelîk Ozbîngole derheqê babete de zanayîş da û va: "14ê Hezîrane de xebatê weçînayîşî kerdê mehne û vera keyeyê Şenyaşarî hêriş vorazyayo. Ma roja ewil ra hedîse taqîb kenê. Hepsîyê keyeyê Şenyaşarî nika eşrawitê Hepisxaneyê Elezîzî. Ma sey avûkatê keyeyî îtîrazê xo kenê. Seba ke bi hawayêke cidî şert û mercê pawitişê rewa estê.”

	 

	'Dosya de tu averşîyayîş çin o'

	 

	Sevda dewamê qiseykerdişê xo de da zanayîş ke hêriş şerê keyeyî ra wetayîr, hetê ey sîyasî esto û va: "Qeraro nimte yê dosya esto. Seba mexdurîyetê keyeyî wirzo, waştişê ma dewam kenê. Keye seba asayîşê domananê xo yê nêweşxaneyî bi endîşeyîn ê. Hedîse bî rojeva ma hemine la seba qeraro nimte ma nêeşkenê çîyêk pare bikerê. La keyeyê Şenyaşarî kesêke tepişnayeyo. Ma zanayîş selahîyetdaran ra musenê. Heto bîn ra cigêrayîş zî aver nêşono. Dosya de zî averşîyayîş çin o."