Feleknas Ûca: Bêhurmetî nîşanê erjê komelî danî 

2018-07-21 14:25:15


	 

	WAN-Derheqê parlementerê HDPyî Feleknas Uca û Mehmet Ruştu Tiryakî de bi mehneya tewrê cenazeyê endamê HPGyî bîyo tehqîqat dîya dest pêkerdiş. Feleknas Ucaye reaksîyon nawit tehqîqatî û dîyar kerde ke bi nê qeraran bêhurmetî nîşanê erjê komelî danî. 

	 

	Badê ke Tirkîya de weçînayîş qedîya, her roje derheqê parlementeranê Partîya Demokratîke ya Şaran (HDP) de tehqîqat dîyenî dest pêkerdiş. Badê parlementerê HDPyî yê Amedî Remzîye Tosune derheqê Feleknas Uca û Mehmet Ruştu Tiryakî de zî bi mehneya tewrbîyayîşê merasîmê cenazeyê endamê HPGyî Dewran Baysalî ke Colemergî de cuya xo vînî kerdbî, tehqîqat dîya dest pêkerdiş. Feleknas Ucaye derheqê destpêkerdişê tehqîqatî de qisey kerde.

	 

	Feleknase destpêkê qiseykerdişê xo de reaksîyon nîşan daye tehqîqatî û wina va: “ Tu cayê dinya de tewrbîyayîşê merasîmê cenazeyan sûc nîyo. Tirkîya de prensîbê dîn û bawerî yenî pelçiqnayîş. No qerar siyasî yo. Prosesê weçînayîşî de parlemento de tewrbîyayîşê merasîmê cenazeyan bîbî babetêk pîl. Tewrbîyayîşê merasîmê cenazeyan bî sebebê tehqîqatan. Na rewşe newe nîya. Nê çîyî prosesê kehen de zî virazîyayî û parlemento de ameyî munaqeşekerdiş. Siyasetê dewleta Tirkîya mîyanê şer de yeno çinkerdiş û înkarkerdiş. Wexto ke rejîm sîstemê xo dano bedilnayîş, derheqê parlementeran de tehqîqat dîyeno dest pêkerdiş. Wazenê rojev bibedilnî û rayanê nijadperantan bigîrî."

	 

	'Ganî no problem bêro çareserkerdiş'

	 

	Feleknase dewamê qiseykerdişê xo de wina va: “Tu cayê dinya de bawerî hende nêameyo pelçiqnayîş. Tu cayê dinya de finakê winasî çin o. Yeno mi vîr, wexto ke wesayîtê ambulansî yê ereban vîyartêne, ma vera cenazeyan de weriştêne payan ser. Qey ma ewro krîmalîzekerdişê cenazeyan hende kenî rojev. No girêdayeyê siyasetê dewlete yo. Seba ke êdî cenaze nêrî û hesira çimanê dayikan nêrijî, ganî no problem bi hawayo lez bêro çareserkerdiş.”

	 

	'Ma parlementerê şarî yî'

	 

	Feleknase qiseykerdişê xo de bale ante lazimîya çareserî ser û wina dewam kerde: “Lazimî bi çareserî esta. No problem realîteya welatî yo. Bi serran o cenaze yenî. Tu prosesêk de hende krîmalîzekerdişê cenazeyan û mezelan nêameyo kerdiş. Goristanê Xerzanî ra 267 cenazeyî ameyî vetiş. Perê Goristanê Yenîkoyî de kerrayê mezelan ameyî şikitiş. Na rewşe kamî cu bawerî de esta. Merdimê merdeyan ser de siyaset yeno kerdiş. Bi hezaran cenazeyê bêname estî. Seba ke wina dewam nêkero, ganî çareserî bêro dîyiş. Se beno wa bibo, ma parlementerê şarî yî û bi îradeya şarî ameyî weçînayîş.”

	 

	'Erjê şaran ser de siyaset kenî'

	 

	Feleknase qiseykerdişê xo yê peyênan de wina va: “Tu makeqanûnan de tewrbîyayîşê merasîmê cenazeyan sûc nîyo. Ma hukmat, dozger û heme kesan ra pers kenî, kamî cu makeqanûnan de tewrbîyayîş merasîman sûc o? Ma rê îzehet bikerên. Tu kitabê bawerî de çîyêk winasî nîno nuştiş. Wazenê HDPyî krîmîlaze bikerî. Wa hesabê teşhîrkerdişê bedenê Ekîn Wan û ruturepalkerdişê bedenê aye bidî û derheqê înan de tehqîqat bidîyî destpêkerdiş. Derheqê înan de tehqîqat nêdanî dest pêkerdiş. Dayika Taybete 7 rojan raste de mîyanê gonî de mende. Kesê ke înan kerdî nînê muhakemekerdiş. Wa kesêk erjê şaran ser de siyaset nêekro.”