Arzûya ke Soma de lajê aye cuya xo vinî kerd: Gor de zî înan rehet nêverdenê 

2018-07-20 13:06:28


	 

	ÎZMÎR - Arzu Kilinça ke Somayî de lajê aye cuya xo vinî kerd, reaksîyon vera bêvengîyê dadgehe mojna ra û wina va: “Ma do heta Ewropa şorê tena seba edalet bi ca bêro. Eke çîyêk bibo ganî ma heme wirzê serê lingan. Ez her roje meşyaya. Nêverdenê ke domanê ma gorê xo de zî rehet rakoyê."

	 

	Madenê Somayî de 301 kesî cuya xo vinî kerdî û seba sûcdaran zî cezayê sey xelat ameyî dayîş. Keyeyan vera na rewşe reaksîyon mojnayî ra û her ke şono reaksîyonê înan zêde beno. Maya Sezaî Kilinç, Arzu Kilinçe derheqê prosesî de qisey kerde.

	 

	Arzuye da zanayîş ke dewa Elmadereyî ra 2002de şîyê Kinik û baxçeyê tutun, hengure, firingî, îsot, peme û zeytûnan de xebityayê. Arzuye va eke camêrdan biwaştêne xebityayne û wina va: "Ma 20-30 cinî vejîyayne mîyanê erdêke. Camêrdî mîyan de çinbî. Camêrdan karê înşaat û madenî kerdêne. Cinî hewte de di, hîrê rojan bi rojaneyê 60 lîrayî xebityayne. Seba feqîrî camêrdî maden de xebityenê."

	 

	‘Teknîkeran her çî zanayne'

	 

	Arzuye arde ziwan ke madenî temsîlkarê karsazê teknîker ê û wina va: "Teknîkerî cilê spî danê xo ra ser rîyê erdî merdimî ro binê erdî zî benê xof. Xo sey wayîrê madenî vînenê. Her dem vatê ‘roşê bixebityê'. Nêverdayne qisey bikerê. Teknîkerî hetê patronan bî. Yanî kêmasiyê madenî zanayne la qisey nêkerdêne û sey nêvînenê têgeyrayne. 

	 

	Arzuye tewr peyîn qiseykerdişê xo de dîyar kerde ke mudirê kargerî bi karkeran dir eynî sifre de nêniştê ro û va: “Lajê mi rojêke bê xurînî şi. Temsîlkarê mudirê kargerî Îsmaîl Adari, termose lajê mi gino erzeno serê bandî. Seba feqîrî tena awa firingiyan û margarîn werdêne. Sey heywanan înan vînayne. Ma eşkenê heta Ewropa şorê û ma wazenê ke edalet virazyo. Eke çîyêk bibo zî ganî heme pîya wirzê serê lingan. Domanê ma gorê xo de nêeşkenê rehet rakoyî."