Pisporî hişyar kenî: Xo tîje ra bipawên 

2018-07-12 12:08:20


	 

	AMED - Hemsereka Sendîkaya Kedkaranê Xizmetê Sosyal û Weşîye (SES) ya Amedî Gonul Adibellîye dîyar kerd ke do germîya hewayî germîya demserrî ra cîya biba û ganî vîşêrê rewşê lezgînî kesêk nêvejîyo teber û tîja roje ra xo bipawî.

	 

	Bajarê Amedî de germîya hewayî goreyê dereceya normalî yê demserrî şona. Dereceyê germîya hewayî resena 41-42 dereceyan. Germîyan vera hemwelatîyî xo erzenî awe û şonê rasteyê zergunan. Hemsereka Sendîkaya Kedkaranê Xizmetê Sosyal û Weşîye (SES) ya Amedî Gonul Adibellîye qala tesîrê hewayê germî kerde û dîyar kerde ke ganî heme kesî xo tîjê zirarin yê roje ra bipawî.

	 

	Beno sebebê nêweşîyan

	 

	Gonule qiseykerdişê xo de wina va: “Ganî heme kesî xo tîje ra bipawî. Çimkî tîja zêde zirarin a. Germîya zêde bena sebebeê nêweşîyan. Taybet tansîyon vejyeno raste. Ganî tewr zêde kal, pîr, doman û kesê nêweşî xo baş bipawî. Mabenê saetê 12.00 û 14.00î de ganî kesêk nêvejîyo teber. Ganî kincê peme û sipe bêrî tercihkerdiş û awe zêde bêra şimitiş. Sewbîna zî ganî kremê ke merdiman tîje ra pawenî bêrî xorasawitiş. Ganî rojek de 3 lître awe bêra şimitiş.”