Na taxe de ekonomî cinîyan ra yena perskerdiş 

2018-07-12 11:19:21


	 

	Gulîstan Azak

	 

	AMED - Taxa Tîlalo ya 12 kîlometreyî bajar ra durîya, ramitiş, pesûdewarkarî û  heta xebitnayîşê dikanê qij cinîyan ra yenê perskerdiş. 

	 

	Cinîyê taxa Tîlalo yo ke 2 hezar û 224 nifûsê ci esto û Amed ra 12 kîlometre durî yo, bi kar dir meşgul benê. Taxe de heme esnafî cinîyan ra yenê meydan. Yew ê cinîyan ra zî Evîn Sirtlan a. Evîne va merdim vajo na dewe, dewe cinîyan a şaş nîyo û wina va: "Baxçe, rezan, koyan, dikanan cinî ewnîyenê. Her kar destê cinîyan de yo. Merdim camêrdê na dewe nêvîneno. Debara keyeyî cinîyan girewto serê xo."

	 

	Dewa cinîyan a

	 

	Evîne dewamê qiseykerdişê xo de da zanayîş ke na taxe de heme berpirsyarî serê cinîyan de ya û wina va: "Her karî cinî kenê. Citkarî kenê, pesûdewarkarî û esnafî kenê. Çimeyê debare zî xeylê xo esnafî ya. Çar dikanê zî cinî xebitnenê. Dikan baxçeyê keyeyî yê. Ma şitê xo, hakanê xo, mastê xo û awa firingîyanê xo tîya roşenê."

	 

	Baxçeyê keyeyê xo de dikan akerde

	 

	Cina bi nameyê Îmîş Tatli ke dikanê xo baxçeyê keyeyê xo de akerda û va bi 6 serrî yo nê karî kena û va berardişan merkez ra ana dikanê xo de roşena.

	 

	Cinîya bi nameyê Havva Urdu ya aye zî esnafî kena dikanê aye serê rayîrê mekteba dewe de yo û va zafê xo mamoste û wendekarî yenê dikan û va aye karê xo bi heskerdiş kena.